“ရှမ်းရှေ့ဒေသအကုန်လုံးက စားသောက်ကုန်ထုတ်သမျှကို ထောက်ခံချက်တွေရဖို့ လိုအပ်တာမှန်သမျှ ကျွန်တော်တို့ကို ဆက်သွယ်ပါ။ ထောက်ခံချက်ရရှိရေးလုပ်ငန်းစဉ်မှာ လိုအပ်တာတွေကို ကျွန်တော်တို့ လုပ်ပေးမှာဖြစ်ပါတယ်။ ရက်ပေါင်း (၉၀)အတွင်း အဓိကလုပ်ကိုင်တာက အိမ်တွင်းစက်မှုလက်မှုလုပ်ငန်းတွေ ထောက်ခံချက်လုပ်ဖို့ အဓိကစည်းရုံးလုပ်ဆောင်တာပါ။ ဒီလိုလုပ်တာမှာ ရှမ်းအရှေ့မှာရှိတဲ့ စားသောက်ကုန်ထုတ်လုပ်ငန်းအားလုံး ထောက်ခံချက်ယူဖို့နဲ့ ထောက်ခံချက်ယူတဲ့ကာလအတွင်း ဆက်လက်ထုတ်လုပ်ခွင့်တွေကို လုပ်ဆောင်ပေးနေတာပါ။ ဒါပေမဲ့ စားသောက်ကုန်တင်သွင်းတာမျိုး ကုန်သွယ်ရေးနဲ့ဆိုင်တာကိုတော့ ကူညီပေးလို့မရဘူး။ ဒါက စီးပွားကူးသန်းနဲ့ သက်ဆိုင်တာဆိုတော့ ဘယ်လိုထောက်ခံချက်အတွက် ဘယ်ဌာနကိုသွားပါဆိုတာမျိုး လမ်းညွှန်ပေးနိုင်ပါတယ်”ဟု ကျိုင်းတုံခရိုင်စားသုံးသူအငြင်းပွားမှုဖြေရှင်းရေးအဖွဲ့ အတွင်းရေးမှူး ဦးသန်းစိုးက တာချီလိတ်သတင်းအေဂျင်စီသို့ ပြောသည်။

ရှမ်းပြည်နယ်အစိုးရနှင့် ပြည်နယ်အငြင်းပွားမှုဖြေရှင်းရေးအဖွဲ့တို့ ပူးပေါင်းကာ  သြဂုတ်လမှ အောက်တိုဘာလအထိ ရက်(၉၀)စီမံချက်ကာလသတ်မှတ်ကာ ဒေသတွင်းမှ အိမ်တွင်းစက်မှုလက်မှုလုပ်ငန်းများ၊  အသေးစားစက်မှုလက်မှုလုပ်ငန်းများ၊ စားသောက်ကုန်ထုတ်လုပ်မှုအားလုံး ထောက်ခံချက်ရယူဆောင်ရွက်ရေး ပညာပေးစည်းရုံးလုပ်ဆောင်နေခြင်းဖြစ်ကြောင်း သိရသည်။

“ဒီလုပ်ငန်းစဉ်တွေနဲ့ ပတ်သက်တဲ့ အသိပညာပေးမှုတွေကိုလည်း ရက် (၉၀)အတွင်းမှာ ရသလောက် ကျွန်တော်တို့ လုပ်သွားမှာပါ။ သက်ဆိုင်ရာ ရပ်ကွက်၊ မြို့နယ်အုပ်ချုပ်ရေးဘက်က တာဝန်ရှိသူတွေက ကိုယ့်ရပ်ကွက်၊ မြို့နယ်အတွင်း လုပ်ငန်းရှင်တွေ စုပေးပြီး လာလုပ်ပေးပါဆိုရင် ရှမ်းအရှေ့ ဘယ်နေရာပဲဖြစ်ဖြစ် သွားလုပ်ပေးမှာပါ” ဟု ကျိုင်းတုံခရိုင်စားသုံးသူအငြင်းပွားမှုဖြေရှင်းရေးအဖွဲ့ အတွင်းရေးမှူး ဦးသန်းစိုးက  ပြောသည်။

ရှမ်းပြည်နယ်အရှေ့ပိုင်းတစ်ခုလုံးအတွက် စီမံချက်ဆောင်ရွက်ရန်ဖြစ်သော်လည်း ရက် (၉၀) စီမံချက်၏ ပထမရက်ပေါင်း (၃၀)ကျော်လာသည့် စက်တင်ဘာလ (၇)ရက်နေ့အထိ ဌာန၏ဝန်ထမ်းအင်အားအရ    ကျိုင်းတုံမြို့နှင့် အနီးဝန်းကျင်ကျေးရွာများအထိသာ ဆောင်ရွက်ထားနိုင်ပြီး တာချီလိတ်၊ မိုင်းဖြတ်စသည့်   ဒေသများမှ လုပ်ငန်းရှင်များအား ပညာပေးစည်းရုံးရေးအတွက် ဒေသအုပ်ချုပ်ရေးအဖွဲ့များ၏ အကူအညီရယူဆောင်ရွက်ရန် လိုအပ်နေကြောင်း သိရသည်။

“စီးပွားကူးသန်းဌာနရဲ့ ရှမ်းပြည်နယ်အရှေ့ပိုင်းအတွက် အင်အားက (၁၈)ယောက်ပဲရှိတယ်။ အင်အားမရှိတာရယ်၊ ရုံးအဆောက်အဦးမရှိတာရယ်၊ ဖွဲ့စည်းပုံမရှိတာရယ်ကြောင့် လတ်တလောမှာ ကျိုင်းတုံခရိုင်မှာပဲ စားသုံးသူအငြင်းပွားမှုဖြေရှင်းရေးကော်မတီ ရှိပါသေးတယ်။ စားသုံးသူရေးရာဌာနတွေကို ခရိုင်အလိုုက်ဖွင့်သွားနိုင်ဖို့ ဆက်ပြီးလုပ်ဆောင်နေပါတယ်”ဟု ကျိုင်းတုံခရိုင် စားသုံးသူ အငြင်းပွားမှုဖြေရှင်းရေးအဖွဲ့       အတွင်းရေးမှူး ဦးသန်းစိုးက ပြောသည်။

လက်ရှိစီမံချက်သည် ကုန်သွယ်ရေးဥပဒေ၊ ပြည်နယ်အစိုးရ စည်ပင်ဥပဒေ၊ စက်မှုကြီးကြပ်ဥပဒေ၊ စားသုံးသူကာကွယ်ရေးဥပဒေ၊ FDA ဥပဒေ၊ ကျန်းမာရေးဥပဒေစသည့် ဥပဒေ(၆)ခုနှင့့်မကိုက်ညီသည့် စားသောက်ကုန်များ ထုတ်လုပ်ခြင်း၊ တင်သွင်းခြင်း၊ ရောင်းချခြင်းမရှိစေရန် အသိပညာပေးပြီး ကိုယ်တိုင်လိုက်နာလုပ်ဆောင်စေရန်ဖြစ်ကြောင်း သိသည်။

“ကိုယ်ကိုယ်တိုင် ရှင်းလင်းရင် ရှင်းလင်း၊ မရှင်းလင်းလို့ ရက် (၉၀)ကာလကျော်တာနဲ့ အရေးယူူမှုတွေ လုပ်သွားတော့မှာပါ။ ဒါတွေကို စျေးထဲမှာလည်း ရှင်းလင်းပြီးပြီ။ မြို့ထဲက ကုန်သည်တွေကိုလည်း   ရှင်းလင်းပြီး ပြီ။ အားလုံးကိုလည်း သိရှိကြောင်း လက်မှတ်ထိုးခိုင်းပြီးပြီ။ စျေးထဲမှာ ရပ်ကွက်ထဲမှာ အသိပေးကြေညာစာရွက်တွေ ကပ်ပေးတယ်။ ကျေးရွာတွေကိုလည်း ကွင်းဆင်းပါမယ်။ စီးပွားရေးလုပ်ငန်းရှင်တွေကိုလည်း      ခေါ်တွေ့ပါမယ်”ဟု ကျိုင်းတုံခရိုင် စားသုံးသူ အငြင်းပွားမှုဖြေရှင်းရေးအဖွဲ့ အတွင်းရေးမှူး ဦးသန်းစိုးက   ပြောသည်။

ရှမ်းပြည်နယ်အရှေ့ပိုင်းဒေသတွင် အသေးစား၊ အလတ်စား အိမ်တွင်းစက်မှုလက်မှုလုပ်ငန်းအများဆုံးမှာ ကျိုင်းတုံမြို့နှင့် တာချီလိတ်မြို့တို့တွင် ရှိနေသော်လည်း တာချီလိတ်မြို့တွင် အဆိုပါစီမံချက်နှင့်ပတ်သက်၍ အသိပညာပေးရှင်းလင်းခြင်းများ လုပ်ဆောင်နိုင်ရန် စားသုံးသူရေးရာဌာနအနေဖြင့် ဒေသအဖွဲ့အစည်းများ၏ ပူးပေါင်းကူညီမှု ရယူရန် လိုအပ်နေကြောင်း သိရသည်။

လက်ရှိတွင် ကျိုင်းတုံမြို့မှ ရေသန့်စက် (၁၃)ခုအနက် FDA နှင့် ကျန်းမာရေးထောက်ခံချက်ရှိထားသည့် စက်ရုံ (၂)ခုမှလွဲ၍ ကျန်စက်ရုံအားလုံး လိုအပ်သည့်ထောက်ခံချက်များရရှိရန် ဆောင်ရွက်နေဆဲဖြစ်၍ ထုတ်လုပ်သည့်ပစ္စည်းများအား ကိုယ်တိုင်တာဝန်ယူစေပြီး ဆက်လက်ထုတ်လုပ်ခွင့်ပြုထားကြောင်း သိရသည်။

သတင်း #ချယ်ရီထိုက်
ဓါတ်ပုံ #စားသုံးသူရေးရာဦးစီးဌာန(ကျိုင်းတုံ)