~~~~~~~~⊰❂ unicode ❂⊱~~~~~~~~

ရှမ်းပြည်နယ်(အရှေ့ပိုင်း) ကျိုင်းတုံမြို့တွင် ၂၀၁၅- ၂၀၁၆ ဘဏ္ဍာနှစ်နောက်ပိုင်း ပထမဆုံးအကြိမ် ဖမ်းမိသော ရှားပါးလိပ် (၁၀)ကောင်အား ဘေးမဲ့သစ်တောကြိုးဝိုင်းတွင် ပြန်လွှတ်ပေးလိုက်ပြီး ဝက်ဝံခြေလက်(၄)ချောင်းအား သြဂုတ်လ (၃၀)ရက်နေ့တွင် မီးရှို့ဖျက်ဆီးလိုက်ကြောင်း သိရသည်။

“ဖမ်းဆီးရမိတာ ဝက်ဝံခြေ(၄)ချောင်း၊ လက်(၄)ချောင်းဗျ။ လိပ်က လိပ်ဘီးဝန်း (၁၀)ကောင်။ ကျွန်တော်တို့ ဒီမှာ နောက်ဆုံးဖမ်းဆီးရမိတာ ၂၀၁၅- ၂၀၁၆ ဘဏ္ဍာနှစ်မှာပါ။ အဲဒီတုန်းက ဘွတ်ကလုံငှက်တွေ၊ ဒီနောက် ၂၀၁၆- ၂၀၁၇ မှာ ဖမ်းမိတာမရှိဘူး။ ကျိုင်းတုံနဲ့ မိုင်းခတ်လမ်းပေါ်က နောင်ဖာရဲကင်းဂိတ်မှာ ဖမ်းဆီးရမိတာပါ” ဟု ကျိုင်းတုံမြို့ သစ်တောဦးစီးဌာန ဦးစီးအရာရှိ ဦးကိုကိုမျိုးက တာချီလိတ်သတင်းအေဂျင်စီသို့ ပြောသည်။

ကျိုင်းတုံမြို့ နောင်ဖာဂိတ်တွင် ဖမ်းမိသော ရှားပါးလိပ်များအား သြဂုတ်လ (၂၉)ရက်နေ့တွင်၊ ကျိုင်းတုံသစ်တောဦးစီးဌာနမှူးနှင့် ဝန်ထမ်းများ၊ ကျိုင်းတုံမြို့မရဲစခန်းမှူးနှင့် အဖွဲ့ဝင်များ၊ ရပ်ကွက် အုပ်ချုပ်ရေးမှူးများ၊ ကျိုင်းတုံခရိုင်စားသုံးသူရေးရာဦးစီးဌာနနှင့် စရဖ ဝန်ထမ်းများပါဝင်သည့်အဖွဲ့က လွယ်မွေသဘာဝဘေးမဲ့ သစ်တောကြိုးဝိုင်းတွင် လွှတ်ပေးလိုက်ပြီး ဝက်ဝံအပိုင်းအစများအား သြဂုတ်လ (၃၀)ရက်နေ့တွင် သစ်တောဦးစီးဌာနဝန်ထမ်းများက နောင်နွန်းသစ်တောဦးစီးဌာနဝန်းအတွင်း မီးရှို့ဖျက်ဆီးလိုက်ကြောင်း သိရသည်။

ကျိုင်းတုံနှင့် မိုင်းဆတ်လမ်းရှိ နောင်ဖာပူးပေါင်းစစ်ဆေးရေးစခန်းတွင် ခရီးသည်တင်ကားတစ်စီးအား စစ်ဆေးရာမှ အဆိုပါလိပ်နှင့် ဝက်ဝံကိုယ်ခန္ဓာအစိတ်အပိုင်းများ သယ်ဆောင်လာသူအား ဖမ်းဆီးရမိခြင်းဖြစ်ကြောင်း သိရပြီး သယ်ဆောင်လာသူအား ကျိုင်းတုံမြို့မရဲစခန်းတွင် တောရိုင်းတိရစ္ဆာန်နှင့် သဘာဝအပင်များကာကွယ်ရေးနှင့် သဘာဝနယ်မြေများ ထိန်းသိမ်းရေးဥပဒေ ပုဒ်မ ၃၇(က) ဖြင့်အမှုဖွင့်ဆောင်ရွက်ထားကြောင်း သိရသည်။

သတင်း #ချယ်ရီထိုက်
ဓာတ်ပုံ #စားသုံးသူရေးရာဦးစီးဌာန