ထိုင်း - မြန်မာ နယ်စပ် မယ်ဆိုင်မြို့ရှိ မဲခေါင်ဒေတာဟိုတယ် အနောက်တွင် မြန်မာ - ထိုင်း ကုန်စည်ပြပွဲနှင့် အတူ မြန်မာ - ထိုင်း ကုန်သည်အသင်းတို့ ဆွေးနွေး ဖလှယ်မှုများ ပြုလုပ်သွားမည် ဖြစ်ကြောင်း သိရသည်။

မြန်မာ - ထိုင်း ကုန်စည်ပြပွဲအဖြစ်၂၀၁၇ခုနှစ် သြဂုတ်လ(၂၅)ရက်နေ့မှ သြဂုတ်လ(၂၉)ရက်နေ့အထိ သတ်မှတ်ရက်၏ နေ့စဉ် ထိုင်းစံတော်ချိန် နံနက်(၉)နာရီမှ ည(၉)နာရီအချိန်များတွင် ပြုလုပ်မည်ဖြစ်ရာ ဆိုင်ခန်းပေါင်း (၂၀၀)ဖွင့်လှစ်မည်ဖြစ်ပြီး ထိုင်းနိုင်ငံမှ ရိုးရာပစ္စည်းများ၊ ထိုင်းနိုင်ငံတွင်း ပြုလုပ်သည့် စက်မှု/လက်မှု ပစ္စည်းများကို ပြသရောင်းချပေးသွားမည်ဖြစ်ကြောင်း နှင့် မြန်မာဘက်မှ ရိုးရာရက်ကန်း အထည်များ၊ အာခါရိုးရာအဝတ်အထည်များ၊ ရွှခြေည်ငွခြေည်ထိုး ပစ္စည်းများနှင့် ပြည်တွင်းဖြစ် ကုန်ပစ္စည်းများအား သွားရောက် ပြသ ရောင်းချမည်ဖြစ်ကြောင်း သိရသည်။

"ဒီပွဲကိုတော့ ဘန်ကောက်က လာလုပ်တာ၊ စားသောက်ကုန်လည်း များတယ်၊ ရိုးရာအဝတ်အထည်တွေလည်း ပါတယ်။ ဈေးနှုန်းချိုသာစွာနဲ့ ရောင်းပေးမယ်လို့ သိရတယ်၊"ဟု တာချီလိတ်မြို့နယ် နယ်စပ်ကုန်သည်ကြီးများအသင်းရုံးမှ ဒေါ်ရွှေစင်ထွန်းက ဆိုသည်။

ဆက်လက်၍ သြဂုတ်လ(၂၅)ရက်နေ့မှ (၂၆)ရက်နေ့များတွင် မယ်ဆိုင်မြို့ရှိ မဲခေါင်ဒေတာဟိုတယ်၌ ရှမ်းပြည်နယ် တောင်ကြီး၊ မူဆယ်၊ ကျိုင်းတုံ နှင့် တာချီလိတ်တို့မှ ကုန်သည်များ နှင့် ထိုင်းနိုင်ငံဘက်မှ ကုန်သည်များက Maesai Boder Trade Export ခေါင်းစဉ်ဖြင့် အချင်းချင်း ဆွေးနွေးဖလှယ်ပွဲကိုလည်း ပြုလုပ်သွားမည်ဖြစ်ကြောင်း၎င်းထံက သိရသည်။

ယခု ကျင်းပပြုလုပ်မည့် ကုန်စည်ပြပွဲတွင် မြန်မာ - ထိုင်း ကုန်သည်များ တွေ့ဆုံကာ နယ်စပ်ကုန်သွယ်ရေး တိုးမြှင့်ရန်နှင့် ရင်းနှီးမြှုပ်နှံမှု အခွင့်အရေးကောင်းများ ရရှိနိုင်ရန်အတွက် အထူးဆွေးနွေးမှုများ ပြုလုပ်သွားမည် ဖြစ်ကြောင်း သိရသည်။

အဆိုပါ ကုန်စည်ပြပွဲသို့ မြန်မာဘက်မှ လာရောက် ရောင်းချနိုင်ရန်အတွက် ဆိုင်ခန်းအချို့အား အခမဲ့ စီစဉ်ပေးထားသည့် အတွက် ဦးရာလူစနစ်ဖြင့် ပေးမည်ဖြစ်ရာ တာချီလိတ်နယ်စပ်ကုန်သည်ရုံးတွင် သြဂုတ်လ(၂၄)ရက်နေ့ နံနက်(၁၀)နာရီ အချိန်အထိ နောက်ဆုံးထား၍ စာရင်းလာရောက် ပေးသွင်းနိုင်ကြောင်း နှင့် ဆိုင်ခန်းကိစ္စ နှင့် ပတ်သက်၍ အသေးစိတ်သိလိုပါက မြန်မာဖုန်း ဝ၉၂၅၀၄၇၄၁၄၄ သို့ ဆက်သွယ်မေးမြန်းနိုင်မှာ ဖြစ်ကြောင်း သိရသည်။