~~~~~~~~⊰❂ unicode ❂⊱~~~~~~~~

တစ်ရွာတည်းနေသူနှင့် မိခင်ဖြစ်သူကို ဓားဖြင့်ထိုးပြီး မိမိကိုယ်ကိုဓားဖြင့်ပြန်ထိုးသဖြင့် သုံးဦးလုံး တာချီလိတ်ဆေးရုံတွင် ကုသမှုခံယူနေရ

ရှမ်းပြည်နယ်(အရှေ့ပိုင်း) တာချီလိတ်မြို့နယ်၊ မိုင်းကိုးကျေးရွာအုပ်စု၊ ကျသဲတိုဘိုရွာတွင် သြဂုတ်လ (၆)ရက်နေ့ညနေက တစ်ရွာတည်းနေသူတစ်ဦးနှင့် မိခင်ဖြစ်သူတို့အား ဓားဖြင့်ထိုးကာ မိမိကိုယ်ကိုလည်း ဓားဖြင့်ထိုးသဖြင့် သုံးဦးလုံးဒဏ်ရာ အပြင်းအထန်ရသွားပြီး တာချီလိတ်ခရိုင် ကုတင်(၁၀၀)ဆံ့ ပြည်သူ့ဆေးရုံတွင် ဆေးကုသမှုခံယူနေရကြောင်း သိရသည်။

အဆိုပါရွာမှ အသက် (၂၅)နှစ်အရွယ် ကျလောကျိုးဆိုသူက သြဂုတ်လ(၆)ရက် ညနေ(၅)နာရီခွဲခန့်တွင် တစ်ရွာတည်းနေ အသက် (၃၈)နှစ်အရွယ် ကျလောဖား၏ နေအိမ်ပေါ်တက်၍ ဓားဖြင့်ထိုးသဖြင့် ကျလောဖားမှာ ဒဏ်ရာဖြင့်ထွက်ပြေးစဉ် ကျလောကျိုးက နောက်မှ ပြေးလိုက်လာသည်ကို ဦးကျကဲ၏ နေအိမ်တွင် အလည်အပတ် ရောက်နေသည့် ကျလောကျိုး၏ မိခင်ဖြစ်သူက မြင်သဖြင့် ဝင်ရောက် တားမြစ်ခြင်းဖြစ်ကြောင်း သိရသည်။

ကျလောကျိုးသည် တားမြစ်လာသည့် အသက် (၄၇)အနှစ်အရွယ် မိခင်ဖြစ်သူ ဒေါ်နာဖစ်အားလည်း ဓားဖြင့်ထိုးပြီး မိမိကိုယ်ကို ဝမ်းဗိုက်အား ဓားဖြင့်ထိုးခဲ့သဖြင့် (၃)ဦးလုံးတွင် ဒဏ်ရာပြင်းထန်စွာ ရသွားခြင်းဖြစ်ကြောင်းသိရသည်။

အဆိုပါ ဖြစ်စဉ်နှင့် ပတ်သက်၍ ကျလောကျိုးအား တာချီလိတ်မြို့မရဲစခန်းတွင် (ပ) ၁၆၀/၂၀၁၇၊ ရာဇသတ်ကြီးပုဒ်မ ၄၅/၃၂၆/၃၀၉ ဖြင့် အမှုဖွင့်ဆောင်ရွက်နေကြောင်း သိရသည်။

ဓာတ်ပုံ - မိုင်းကိုး ရပ်/ကျေး