~~~~~~~~⊰❂ unicode ❂⊱~~~~~~~~

ရှမ်းပြည်နယ်တောင်ပိုင်း မြို့နယ်သုံးခု၏ မိခင်နှင့်ကလေးစောင့်ရှောက်ရေးလုပ်ငန်းစဉ် ညှိနှိုင်းဆွေးနွေး
**********
ကျန်းမာရေးဝန်ကြီးဌာနနှင့် Relief Interational (RI)တို့ ရှမ်းပြည်နယ်(တောင်ပိုင်း) သုံးမြို့နယ်တွင် ပူးပေါင်းဆောင်ရွက်နေသည့် မိခင်နှင့်ကလေးစောင့်ရှောက်ရေးလုပ်ငန်းစဉ် ညှိနှိုင်းဆွေးနွေးပွဲအား ဇူလိုင်လ (၃)ရက်နေ့က တောင်ကြီးမြို့ ပြည်သူ့ကျန်းမာရေးဦးစီးဌာန အစည်းအဝေးခန်းမတွင် ကျင်းပသည်။

“လုပ်ငန်းဆောင်ရွက်ပြီးစီးမှုတွေကို ပြန်လည်သုံးသပ်တဲ့ ဆွေးနွေးပွဲပါ။ ရှေ့ဆက်လုပ်မယ့် လုပ်ငန်းစဉ်တွေ ဆွေးနွေးမယ်။ ကျွန်တော်တို့ လုပ်နေတဲ့လုပ်ငန်းစဉ်တွေကတော့ ကိုယ်ဝန်ဆောင်သည်တွေ မီးဖွားတဲ့ အချိန်တွေနဲ့ ကလေးတွေအတွက် အာဟာရပြည့်ဝအောင် ကူညီထောက်ပံ့ပေးတာပါ။ ရှေ့ဆက်မယ့် လုပ်ငန်းစဉ်တွေကို ညှိနှိုင်းဆွေးနွေးသွားမှာပါ” ဟု ပြည်နယ်ကျန်းမာရေးဦးစီးဌာနမှ ဒေါက်တာစိုင်းဝင်းဇော်လှိုင် က တာချီလိတ်သတင်းအေဂျင်စီသို့ ပြောသည်။

ထောင်စုနှစ်ဖွံ့ဖြိုးတိုးတက်ရေး ရည်မှန်းချက်(၃)ခု ရန်ပုံငွေဖြင့် ကျန်းမာရေးဝန်ကြီးဌာနနှင့် Relief Interational (RI) အဖွဲ့တို့က ရှမ်းပြည်နယ်တောင်ပိုင်း ဆီဆိုင်၊ လဲချားနှင့် မောက်မယ်မြို့နယ်သုံးခုတွင် ရည်မှန်းချက် ရန်ပုံငွေဖြင့် စီမံကိန်းဆောင်ရွက်နေခြင်းဖြစ်ကြောင်း သိရသည်။

အဆိုပါဒေသများတွင် ကိုယ်ဝန်ဆောင်စောင့်ရှောက်ရေး၊ အရေးပေါ်ကလေးမွေးကြို ပြုလုပ်ပေးခြင်း၊ အာဟာရပြည့်ဝခြင်းလုပ်ငန်း၊ နှစ်လပြည့်ကလေးငယ်များ ကာကွယ်ဆေးထိုးနှံခြင်းလုပ်ငန်းများအား ဆောင်ရွက်နေခြင်းဖြစ်ကြောင်း သိရသည်။

သတင်း၊ဓါတ်ပုံ #နိုနို