ရွှေလီမှ တံတားကြေးကောက်သည့်ဂိတ်ဖြိုချမှု မူဆယ် - ရွှေလီ ကူးသန်းသွားလာမှုအား မထိခိုက်
                                                  *************
ရှမ်းပြည်နယ်မြောက်ပိုင်း မူဆယ်မြို့နှင့် နယ်စပ် တရုတ်နိုင်ငံ ရွှေလီမြို့ဘက်တွင် တံတားဖြတ်သန်းခ ကောက်ခံသည့် အဆောက်အဦးအား ဖြိုချခြင်းကြောင့် ယာဉ်အသွားအလာခေတ္တပိတ်ဆို့သည်ဟု သတင်းများထွက် နေသော်လည်း မြန်မာနိုင်ငံမှ ယာဉ်အသွားအလာမှာ  ဇွန်လ(၂)ရက်နေ့တွင် ပုံမှန်အတိုင်းရှိကြောင်း သိရသည်။

“သူတို့က တံတားဆောက်လုပ်ထားတဲ့ ကုန်ကျစရိတ်ကို တံတားဖြတ်သန်းခဆိုပြီး ပြန်ကောက်တာ။ အခု ကောက်ခံလို့ရတာတွေက တံတားတန်ဖိုးပြန်ရပြီဆိုတော့ ကောက်ခံတဲ့ဂိတ်ကို ဖျက်လိုက်တာပါ။ သူတို့ပိုင်တဲ့ဟာကို ဖျက်တာပဲလေ။ ဒီမနက်ကနေစပြီးတော့ ယာဉ်တွေ ပုံမှန်အတိုင်းသွားလာနေကြပါပြီ။ ပြီးတော့ သူတို့ဘက်က ဂိတ်ကိုပြန်ဆောက်တော့မှာ မဟုတ်ဘူးလို့ သိရတယ်”ဟု မူဆယ်ခရိုင်အုပ်ချုပ်ရေးမှူး ဦးကျော်ကျော်ထွန်းက တာချီလိတ်သတင်းအေဂျင်စီသို့ ပြောသည်။

အဆိုပါဂိတ်အဆောက်အဦးဖြိုချခြင်းနှင့်ပတ်သက်၍ ဇွန်လ (၁)ရက်နေ့တွင် မိုးသည်းထန်စွာရွာသွန်းမှုကြောင့် မူဆယ်-ရွှေလီ ဂိတ်ပေါက်အဆောက်အဦး ပြိုကျ ပျက်စီးသွားပြီး မြန်မာနိုင်ငံဘက်မှ ယာဉ်အသွားအလာများ ရပ်တံ့ထားရကြောင်း အွန်လိုင်းတွင် မှားယွင်းရေးသားမှုများ ထွက်ပေါ်လာခဲ့ခြင်းဖြစ်ကြောင်း သိရသည်။

“တရုတ်ဘက်က လမ်းဖြစ်ဖြစ် တံတားဖြစ်ဖြစ်ဆောက်ပြီးရင် ဖြတ်သန်းခ ကောက်တယ်။ သူ့တန်ကြေး သတ်မှတ်ထားတာပြည့်ရင် ကောက်တဲ့ဂိတ်တွေကို ဖျက်လိုက်တယ်။ အခမဲ့သွားခိုင်းတယ်။ လမ်းရဲ့၊ တံတားရဲ့သက်တမ်းက နှစ် (၂၀) ဆိုရင် အဲဒီနှစ် (၂၀) ပြည့်တာနဲ့ ကောင်းကောင်းဆိုးဆိုး အကုန်ဖျက်တယ်။ အသစ်ပြန်လုပ်ရတယ်”ဟု ဦးကျော်ကျော်ထွန်းက ပြောသည်။

အဆိုပါဂိတ်အဆောက်အဦးအား ဇွန်လ(၁) ရက်နေ့ ညနေ (၅)နာရီခန့်တွင် ဖြိုချလိုက်သဖြင့်  ယာဉ်အသွားအလာ ယာယီပိတ်ဆို့ခဲ့ခြင်းသာဖြစ်ကြောင်း သိရသည်။

ဂိတ်က အခွန်မကောက်တော့တာကြာပြီ။ အဲဒီဂိတ်ကို ဖျက်လိုက်ပြီး ပြန်မဆောက်တော့ဘူးလို့ကြားတယ်။ တရုတ်နိုင်ငံက လမ်းတံတားကြေး အပြည့်ပြန်ရရင် အခုလိုပဲ အပြီးဖျက်ဆီးပစ်တာ"ဟု ရွှေလီတွင် (၇)နှစ်ကြာ နေထိုင်နေသည့်ကိုနေဖြိုးကပြောသည်။

သတင်း #နေဖြိုးမြင့်
ဓါတ်ပုံ #နေဖြိုး