ရှမ်းပြည်နယ်အရှေ့ပိုင်းဒေသမှ တရုတ်နိုင်ငံနှင့် တစ်ခုတည်းသော ကုန်းတွင်းပိုင်း ကုန်သွယ်မှု လမ်းကြောင်း ဖြစ်သည့် မိုင်းလားအထူးဒေသသ(၄)ရှိ ဂိတ်နှစ်ခုအား မိုင်းလားအထူးဒေသ (၄)တွင် ဝင်ရောက် တပ်စွဲထားသည့် “ဝ” တပ်ဖွဲ့များက အောက်တိုဘာလ (၂၃)ရက်နေ့မှစ၍ ဖြတ်သန်းခွင့် ပိတ်ထားရာမှ ၂၀၁၇ ခုနှစ် မေလ (၁၄)ရက်အထိ ပြန်လည် ဖွင့်လှစ်နိုင်ခြင်း မရှိသေးဘဲဖြစ်နေရာ ဒေသတွင်း ကုန်သွယ်မှု လမ်းကြောင်းများ၏ အခြေအနေအား ကုန်သွယ်မှုတိုးတက်ရေးအတွက် နယ်စပ်ဝင်ထွက် လမ်းကြောင်းများ ကြီးကြပ်ရေး ရှမ်းပြည်နယ်အစိုးရ ကိုယ်စားလှယ်ဖြစ်သူ ဦးမင်းအောင်အား မေးမြန်းထားပါသည်။

TNA ။   ။   မိုင်းလားဂိတ်ပြန်ဖွင့်နိုင်မယ့်အခြေအနေရှိပါပြီလား။
UMA ။   ။လက်ရှိအချိန်ထိ ကျွန်တော်တို့ ဆွေးနွေးနေတုန်းပဲရှိပါသေးတယ်။

TNA ။   ။   မိုင်းလားပိတ်ထားနေဆဲဆိုတော့ တရုတ်နိုင်ငံဘက်ကို ရှမ်းပြည်နယ်အရှေ့ပိုင်း နယ်စပ်ကုန်သွယ်ရေးလမ်းကြောင်းတွေ အပြောင်းအလဲ ရှိပါသလား။

UMA ။   ။ရှမ်းပြည်နယ်အရှေ့ပိုင်းမှာက တရားဝင်သတ်မှတ်ထားတဲ့ နယ်စပ်ထွက်ပေါက်အနေနဲ့ ဝမ်ပုံဆိပ်ကမ်းရှိမယ်။ တာချီလိတ်မှာ တံတား (၁) နဲ့ (၂)က တရားဝင်သတ်မှတ်ထားတယ်။ နောက်တစ်ခုက မိုင်းယုပေါ့နော်။ တာချီလိတ်ခရိုင် မိုင်းယောင်းမြို့နယ် မိုင်းယုကိုလည်း တရားဝင် သတ်မှတ်ထားတယ်။ ဝမ်တာပင်းကနေ မိုင်းလားကိုလည်း တရားဝင်သတ်မှတ်ထားတယ်။ မိုင်းခတ်၊ မိုင်းယန်းကတော့ တရားဝင်သတ်မှတ်ထားတာ မဟုတ်ဘူး။ ၂၀၁၆ ခုနှစ် အောက်တိုဘာလ (၂၃) ရက်နေ့ကနေစပြီးတော့ လက်နက်ကိုင်တပ်ဖွဲ့တွေ စစ်ရေးတင်းမာလာတော့ ဒေသတွင်းကုန်သည်တွေ အကျပ်အတည်းမဖြစ်အောင် သွားခွင့်ပြုထားတဲ့လမ်း။ အဲဒီလမ်းကြောင်းကို ကုန်သည်တွေကလည်း သိပ်သွားချင်တာမဟုတ်ဘူး။ သို့သော်လည်း တရားမဝင်သွားလို့ရတဲ့လမ်းတွေက ဝမ်ပုံနဲ့ တာချီလိတ်တံတား (၂ )သွားတဲ့လမ်းမှာတင် အများကြီးရှိတယ်။

TNA ။   ။   ပြည်နယ်အစိုးရအနေနဲ့ ဒေသတွင်းနယ်စပ်ကုန်သွယ်မှုတွေကို ကြီးကြပ်ရေး ကိုယ်စားလှယ်ခန့်ထားပြီး လုပ်ဆောင်နေတယ်ဆိုတော့ ရှမ်းပြည်နယ်အရှေ့ပိုင်းက ကုန်သွယ်ရေး လမ်းကြောင်းတွေကိ ကြီးကြပ်ရာမှာ ဘယ်လိုအခက်အခဲတွေ ရှိပါသလဲ။

UMA ။   ။ ထိုင်းနဲ့မြန်မာဆိုတာ ရေမရှိတဲ့ ချောင်းလေးပဲခြားတယ်။ ခုနကလို တရားဝင်သတ်မှတ်ထားတဲ့ နေရာတွေမှာလည်း တရားမဝင်သွားလို့ရတဲ့ လမ်းတွေရှိသလို တရားမဝင်လမ်းကြောင်းတွေကနေ တရားမဝင်လမ်းကြောင်းမျိုးစုံနဲ့ဝင်တယ်။ ဒါတွေကို ကျွန်တော်တို့က ကြီးကြပ်ပေးရတဲ့ခါကျတော့ ယာဉ်တစ်စီးကို အခါအားလျော်စွာစစ်ဆေးရတဲ့အခါကျတော့ ကျွန်တော်တို့က အရေးယူရတော့တာပေါ့။ အမြဲတမ်း လုပ်နေမယ်ဆို လမ်းပန်းဆက်သွယ်ရေး၊ ကုန်သွယ်ရေးတွေမှာ သွားလာရခက်ခဲရတာတွေ ဖြစ်လာမယ်။ ဒီကားကြီးတွေပေါ်မှာပါတဲ့ပစ္စည်းတွေကို တခြားနိုင်ငံမှာ အိပ်စရေး (X-ray)နဲ့ဖတ်လိုက်တာနဲ့ အကုန်လုံးကို မြင်နိုင်တွေ့နိုင်ပေမယ့် ကျွန်တော်တို့မှာကျတော့ အားနည်းချက်တွေရှိနေတယ်။ ဒီမှာက ဘာနဲ့မှမရိုက်နိုင်ဘူး။ ပစ္စည်းအားလုံးချပြီး ရှာရတဲ့ခါကျတော့လည်း ကုန်သည်မှာ အချိန်ကြာတယ်။ အတင်အချအလုပ်သမားခကို ကုန်သည်က ကျခံရတဲ့အတွက် ဒါကလည်းပဲ အဆင်မပြေတဲ့ အချက်တစ်ချက်ပေါ့။ တရားမဝင်ကုန်သွယ်မှုမှာ အဓိက ပတ်သက်နေတဲ့ အချက်တစ်ချက်ကလည်း ခေတ်မီစက်ကိရိယာတွေနဲ့ မစစ်ဆေးနိုင်တာ ကားတစ်စီးပေါ်မှာ ပြောင်းဘယ်နှစ်တန်ပါလဲဆိုတာ ကျွန်တော်တို့ ကတ္တားတွေနဲ့ မစစ်ဆေးနိုင်ဘူး။ တရားမဝင်ကုန်သွယ်မှုမှာ ဒါတွေကလည်း အခြေခံ အချက်တွဖြေစ်တယ်။ ပစ္စည်းကို ကုန်သည်ဆီက သိမ်းလိုက်တယ်။ ကုန်သည်ကို အရေးယူလိုက်တယ်ဆိုတာကလည်း သိပ်အဆင်မပြေဘူး။ သက်ဆိုင်ရာဌာနတွေကနပြေီးတော့မှ ဒီလိုသွားခွင့်ပြုလိုက်လို့ ဒီလိုလာတာဖြစ်တဲ့အတွက် ကုန်သည်ကို ပညာပေးလိုက်မယ်။ လမ်းမှန်ရောက်အောင် လုပ်မယ်။ သို့သော် သက်ဆိုင်ရာဌာနက ဒီဝန်ထမ်းတွေ ဌာနတွေကို ကျွန်တော်တို့က လိုအပ်ရင် လိုအပ်သလို အရေးယူသွားမယ်။ ဖြုတ်ပစ်ဖို့အထိ မဟုတ်တောင်မှလည်း သတိပေးမယ်။ ပြောင်းရွှေ့မယ်။ လစာပရိုမိုးရှင်းတွေ လျှော့တာမျိုး၊ လစာနဲ့နှစ်တိုးရပ်ဆိုင်းတာမျိုး၊ ဝန်ခံကတိလက်မှတ်ထိုးစေတာ စတာတွေကိုလုပ်သွားမယ်။ မိရင်မိတဲ့ကုန်သည်ကိုပဲ အရေးယူနေတဲ့စနစ်ကလည်း တရားမဝင်ကုန်သွယ်မှုကို အားပေးနေတယ်။ အဓိက ပါဝင်ပတ်သက်တဲ့ ဝန်ထမ်းကကျတော့ လွတ်နေတယ်။ တချို့ကုန်သည်က တစ်ကယ်သွားချင်တယ်။ လာတဲ့ကုန်သည်ကို ဒီလိုမလာနဲ့ ဒီလိုလာပါဆိုပြီး ဝန်ထမ်းတွေက လုပ်နေတာ။ ဒါကြောင့်မို့ တရားမဝင်ကုန်သွယ်မှုနဲ့ပတ်သက်ပြီးတော့ ကုန်သည်ကိုပဲ အရေးယူမယ်။ ကုန်သည်ကိုပဲ အပြစ်ပေးမယ်ဆိုရင် ဒီလုပ်ငန်း ဘယ်တော့မှ ပြီးပြတ်မှာမဟုတ်ဘူး။

မှန်မှန်ကန်ကန် လုပ်ချင်နေတဲ့ ကုန်သည်ကို မမှန်မကန်နည်းလမ်းတွေနဲ့ တချို့ဝန်ထမ်းတွေက ဆွဲဆောင်နေတယ်။ ငွေကြေးရယူနေတဲ့လုပ်ရပ်တွေက တစ်ကယ်ရှိတယ်။ ကျွန်တော် တရားဝင် ပြောရဲပါတယ်။ လိုအပ်ချက်တွေရှိတယ်။ အထူးသဖြင့် ရှမ်းအရှေ့မှာက နယ်မြေမတည်ငြိမ်ဘူး။ အဲဒီတော့ တရားမဝင်ကုန်သွယ်မှုတွေကို ထိန်းသိမ်းရတဲ့အခါမှာ လိုအပ်ချက်တွေ ရှိတယ်။ တရားဝင်လို့ ထုတ်ဖော်မပြောနိုင်ပေမဲ့လည်း နားလည်မှုလေးတွေ ပေးရတဲ့အခါတွေရှိတယ်။ သွားလာ ကုန်ကျစရိတ်တက်လာတာနဲ့အမျှ ကုန်သည်က စီးပွားရေးကိုမလုပ်နိုင်တော့ဘူး။ ဒီဟာက တစ်အချက် အခွန်မရတော့ဘူး။ နောက်ကုန်သွယ်မှုလည်း လျော့သွားမယ်။ ဒေသမှာတာဝန်ရှိသူတွေက ဖြေလျော့ပေးထားပါတယ်။ တစ်ခုပြောချင်တာက ဒီဖြေလျော့ပေးမှုတွေကို ရပိုင်ခွင့်လို့ မမြင်ကြဖို့။ ဒါက ဒေသခံတွေ၊ လုပ်ငန်းရှင်တွေ၊ ပြည်သူတွေက ဒီလိုမြင်နကြေတယ်။ ဒါကို ဒီလိုမြင်နေတာ ရေရှည်တိုင်းပြည် အတွက်တော့ မကောင်းဘူး။ အရင်တုန်းကတော့ ပြည်သူလူထုအကျိုးစီးပွားအတွက် ဖြေလျော့ပေးခဲ့တာ။ ခုတော့ ပြည်သူလူထုကရပိုင်ခွင့်လို့ ထင်နကြေတာ။ ဒါကိုဒီလိုတွေးသွားရင်တော့ ရေရှည်မှာ အစိုးရက ဘယ်လောက်ကောင်းတာလုပ်လုပ်။ အဆင်ပြေမှာ မဟုတ်ဘူး။

TNA ။   ။   ပြည်နယ်အစိုးရအနေနဲ့ နယ်စပ်လမ်းကြောင်းတွေကနေ တရားဝင်ကုန်သွယ်ရေးဖြစ်ဖို့၊ အခွန်ရရှိဖို့ စည်းကြပ်ဆောင်ရွက်နေသလို ဒီကုန်သွယ်ရေးလုပ်နေတဲ့သူတွေ လုပ်ငန်းလုပ်ဆောင်ရာမှာ အဆင်ပြေစေဖို့ ဘယ်လိုများ ဆောင်ရွက်ပေးနေတာတွေ ရှိပါသလဲ။

UMA ။   ။ ရှမ်းပြည်နယ်ရဲ့ နယ်စပ်ကုန်သွယ်မှုပမာဏမှာ မူဆယ်ကတော့ (၇၀) ရာခိုင်နှုန်း လောက်ရှိတာပေါ့။ ရှမ်းအရှေ့ကတော့ (၃၀) ရာခိုင်နှုန်းလောက်ရှိတယ်။ ဒီမှာရှိတဲ့ ကုန်သည် လုပ်ငန်းရှင်တွေ ပို့ကုန်သွင်းကုန် ဘယ်ကိစ္စမဆို သက်ဆိုင်ရာအကောက်ခွန်ဦးစီးဌာန၊ သက်ဆိုင်ရာ ကုန်သွယ်ရေးဌာနတွေမှာ မေးလို့ရတယ်။ ရှမ်းပြည်နယ်အစိုးရကို တိုက်ရိုက်ဖြစ်စေ၊ တာဝန်လွှဲအပ်ထားတဲ့ ဌာနကိုဖြစ်စေ ပြောလို့ရတယ်။ ချက်ချင်းဖြေရှင်းဆောင်ရွက်ပေးတယ်။ တရားမဝင်ငွေကြေးတောင်းခံတဲ့ ဟာတွေကိုလည်းပဲ ရှမ်းပြည်နယ်အစိုးရကို တိုင်ကြားလို့ရသလို ရှမ်းပြည်နယ်အစိုးရက တာဝန် ပေးအပ်ထားတဲ့ သူတွေကိုလည်းပဲ စာနဲ့သော်လည်းကောင်း ဖုန်းနဲ့သော်လည်းကောင်း တိုင်ကြားလို့ ရတယ်။ ဒါကို ကျွန်တော်တို့က ဖြေရှင်းပေးမယ်။ လိုင်စင်နဲ့ပတ်သက်လို့ သုံးလပေးထားတယ်။ သုံးလပြီးသွားရင် ကုန်သွားပြီလို့ထင်နေတယ်။ အဲဒါကမှားတယ်။ တကယ် အဲဒီသုံးလအတွင်းမှာ မတင်ပို့နိုင်ရင် ဘယ်လိုကြောင့် မတင်ပို့နိုင်ကြောင်း သက်တမ်းတိုးလိုကြောင်းလာပြီးတော့ ကုန်သွယ်ရေးမှာ သက်တမ်းတိုး လျှောက်ထားလို့ရှိရင် နောက်ထပ် (၂) လ ထပ်ရမယ်။ အဲဒီ (၂) လမှာလည်းပဲ ဒီပစ္စည်းကို မပို့နိုင်သေးလို့ရှိရင် သို့မဟုတ် ပို့ရန်ကျန်နေသေးတယ်ဆိုလို့ရှိရင် ထပ်ပြီးတော့ သက်တမ်းတိုးရင် နောက် (၁) လထပ်ပေးတယ်။ ပထမအကြိမ်နဲ့ သက်တမ်းတိုးတွေ ပေါင်းလိုက်ရင် (၆) လပေါ့။ အဲဒါလေးကိုတော့ အသိပေးချင်တယ်။ ဒါတွေနဲ့ပတ်သက်လို့ ထိခိုက်နစ်နာတယ်ဆိုလို့ရှိရင် ရှမ်းပြည်နယ်အစိုးရကိုဖြစ်စေ ရှမ်းပြည်နယ်အစိုးရက တာဝန်ပေးထားတဲ့ ကိုယ်စားလှယ်ကိုဖြစ်စေ၊ ကုန်သွယ်ရေးဌာနကိုဖြစ်စေ တိုင်ကြားနိုင်တယ်လို့ ကျွန်တော့်အနေနဲ့အသိပေးချင်ပါတယ်။

TNA ။   ။   ကျေးဇူးတင်ပါတယ်။

တွေ့ဆုံမေးမြန်းသူ - ချယ်ရီထိုက်