ရှမ်းပြည်နယ်(မြောက်ပိုင်း) လောက်ကိုင်မြို့အား မတ်လ(၆)ရက်နေ့တွင် MNDAA က ဝင်ရောက် တိုက်ခိုက်ခဲ့ကာ တိုက်ပွဲများဖြစ်ပွားပြီးနောက် ဒေသခံများ နေရပ်စွန့်ခွာထွက်ပြေးနကြေရာမှ ဧပြီ လ အတွင်း လောက်ကိုင်ဒေသသို့ ပြန်လည်ဝင်ရောက်လာကြပြီး မြို့တွင်းပြန်လည်ထူထောင်ရေး လုပ်ငန်းများကို ဒေသ တာဝန်ရှိသူများ၊ လူမှုကူညီရေးအသင်းအဖွဲ့များ၏အကူအညီဖြင့် လုပ်ဆောင်နပြေီ ဖြစ်ရာ ဒေသအခြေအနေများအား သိရှိနိုင်ရန် လောက်ကိုင်မြို့နယ် အုပ်ချုပ်ရေးမှူး ဦးဇော်လင်းမောင်အား မေလ (၂)ရက်နေ့တွင် တွေ့ဆုံမေးမြန်းထားပါသည်။

TNA။ တိုက်ပွဲအပြီးမှာ လောက်ကိုင်ဒေသတွင်း ပြန်လည်ထူထောင်ရေးကာလမှာ ပြန်လည် ဝင်ရောက်လာသူတွေရဲ့အခြေအနေ ဘယ်လိုရှိပါသလဲ။

ZLM။ မြို့ခံလူထုဆိုတာက မြို့ပေါ်ရပ်ကွက်တွေပေါ့ဗျာ။ အဲဒီမြို့ပေါ်နေထိုင်သူတွေက အရင်တုန်းကဆို (၉၀၀၀)ကနေ (၁၀,ဝဝဝ) လောက်ရှိတာပေါ့။ ခုပြန်ဝင်လာတဲ့အချိန်ကျတော့ ကျွန်တော်တို့က ဂိတ်တွေကနေ စစ်ဆေးပြီး စာရင်းကောက်တာဆိုတော့ မြို့ပေါ်နေ လူထုတင် မဟုတ်ဘဲ ကြံခုတ်လုပ်သားတွေလည်း စာရင်းထဲမှာပါလာတာပေါ့။ ဒါကြောင့် စာရင်းတိုးလာတာဖြစ်ပါတယ်။ ကြံခုတ်လုပ်သားတွေ အပြင် မြို့အစပ် နယ်တွေမှာနေတဲ့သူတွေလည်းပါတယ်လေ။ အရင်နေထိုင်သူ (၉၀၀၀) ရှိတဲ့ဥစ္စာကနေ အခု (၁၃၀၀၀) ဖြစ်လာတာတော့ မဟုတ်ဘူးပေါ့။ ဒီဂိတ်ကနေ စာရင်းကောက်နေတဲ့အခါကျတော့ အဲဒီလိုစာရင်းထဲမှာ အကုန်ပါလာတဲ့သဘောပါ။

TNA။ နယ်စပ်ဂိတ်စုစုပေါင်းဘယ်နှစ်ခုလောက်ရှိပါသလဲ။ ဂိတ်တွေရဲ့အခြေအနေကရော ဘယ်လိုရှိပါသလဲ။

ZLM။ လောက်ကိုင်မြို့နယ်နဲ့ တရုတ်ပြည်နဲ့ဆိုရင်တော့ လောက်ကိုင်မြို့နယ်ထဲမှာ ရန်လုံကျိုင်းဂိတ်နဲ့ ချင်းရွှေဟော် မြို့နယ်ထဲမှာ ချင်းရွှေဟော်ဂိတ် စုစုပေါင်း (၂)ဂိတ်ပဲရှိတာပါ။ ဂိတ်တွေရဲ့ အခြေအနေကတော့ ပုံမှန်ပါပဲ။ ရန်လုံကျိုင်းကတော့ မေလ (၁) ရက်နေ့ကနေစပြီး ပြန်ဖွင့်ပေးထား တယ်လေ။ အခုကတော့ စဖွင့်ကာစပေါ့။ ပုံမှန်အနေအထားရောက်ဖို့ဆိုတာကတော့ သူ့ဟာနဲ့သူ အချိန်ယူရမှာပေါ့။ ဂိတ်တွေကတော့ နယ်မြေခံလူထုအတွက် မရှိမဖြစ်လည်းသုံးနေရတယ်။ ကုန်စည်တွေ တင်ပို့တာ တင်သွင်းတာတွေလည်း ဒီဂိတ်တွေကိုပဲအားကိုးနေရတာဆိုတော့ မဖွင့်မဖြစ် ပြန်ဖွင့်ပါတယ်။

TNA။ ဒေသတွင်းမှာလုံခြုံရေး အာမခံချက်ပေးနိုင်မှုအနေအထားကရော ဘယ်လိုရှိပါသလဲ။
ZLM။ ကျွန်တော်တို့အနေနဲ့ကတော့ တရားဥပဒေစိုးမိုးရေးကိစ္စ၊ လုံခြုံရေးကိစ္စတွေကို ဒီမှာရှိတဲ့ ဌာနဆိုင်ရာ အဖွဲ့အစည်းတွေရော တပ်မတော်ရော သက်စွန့်ဆံဖျား အကုန်လုံး လုပ်ပါတယ်။ အဲဒီအပိုင်းတွေ ကတော့ ပြည်သူတွေအတွက် ဒီဒေသတစ်ခုလုံးအတွက် ကျွန်တော်တို့မှာရှိတဲ့ ဌာနဆိုင်ရာတွေအကုန်လုံး ကြိုး ကြိုးစားစားနဲ့ ဒေသတည်ငြိမ်အေးချမ်းရေးနဲ့ ဒေသလုံခြုံရေးအတွက် လုပ်ပေးနေပါတယ်။ လုပ်ငန်းတစ်ခုဆိုတာကတော့ သူ့အတိုင်းအတာနဲ့သူတော့ တချို့အခက်အခဲလေးတွေ ရှိကောင်းရှိနိုင်တာပဲ။ တချို့ဟာတွေလည်း ဖြေရှင်းလို့ရပါတယ်။ ပြောမယ်ဆိုရင်တော့ ပြန်လည် ထူထောင်ရေး ဒေသတည်ငြိမ် အေးချမ်းရေး လုပ်ငန်းတွေ လုပ်ဆောင်တဲ့နေရာမှာ ဘာဖြစ်တယ် ဘာဖြစ်တယ်ဆိုပြီးတော့ ကြီးကြီးမားမား ဖြေရှင်းရတဲ့အခက်အခဲတော့ မရှိပါဘူး။

TNA။ မြို့ရဲ့ ဘယ်နှစ်ရာခိုင်နှုန်းလောက်ကို ထူထောင်ရေးလုပ်ငန်းတွေ လုပ်ဆောင်ပေးရသလဲ။
ZLM။ ပြန်လည်ထူထောင်ရေးဆိုတဲ့နေရာမှာ လုပ်နေရတာ အများကြီးရှိတယ်။ ဒေသခံပြည်သူတွေရဲ့ စိတ်ပိုင်းဆိုင်ရာ ပြန်လည်ထူထောင်ရေး၊ ရုပ်ပိုင်းဆိုင်ရာပြန်လည်ထူထောင်ပေးဖို့အပိုင်းတွေ စတာတွေ ရှိတယ်။ ရုပ်ပိုင်းဆိုင်ရာအနေနဲ့ဆိုလို့ရှိရင်တော့ ကျွန်တော်တို့မြို့ပေါ်မှာ ထိခိုက် ပျက်စီးဆုံးရှုံးမှု ဘယ်လောက်ထိ ရှိတယ် ဆိုတာမျိုး အရမ်းကြီးရှိတယ်ဆိုတာမရှိခဲ့ပါဘူး။ အဲဒီလိုပါပဲ တိတိကျကျ ပြောရမယ် ဆိုရင်တော့ အရပ်သားပြည်သူတွေပိုင်ဆိုင်တဲ့ အိုးအိမ်စည်းစိမ်တွေ ဆိုးဆိုးရွားရွား ထိခိုက်ပျက်စီးခဲ့တာမျိုး မရှိပါဘူး။

TNA။ မြို့နယ်အတွင်းဖြစ်ပေါ်နေတဲ့ လက်ရှိအနေအထားက ဘယ်လိုရှိမလဲ။
ZLM။ ဒီလိုပေါ့ MNDAA အဖွဲ့တွေက ၂၀၁၇ ခုနှစ် မတ်လ (၅) ရက်နေ့ သန်းခေါင်ကျော် မတ်လ (၆) ရက်နေ့ မနက် အစောပိုင်းမှာ သူတို့ကစပြီးတော့ လောက်ကိုင်ကို တိုက်ခိုက်တယ်။ ဒီက အာဏာပိုင် အဖွဲ့အစည်းတွေ သတ်မှတ်တာကတော့ မတ်လ (၂၅) ရက်နေ့မှာ အကုန်လုံးပြီးစီးတယ်ပေါ့။ MNDAA တွေကို ပြန်ပြီးတော့ တိုက်ထုတ်နိုင်တယ်ပေါ့။ ဒီမှာတော့ သူတို့တွေခြေကုပ်ယူပြီးတော့ တိုက်တဲ့စခန်းတွေ မရှိတော့ဘူး။ ဒါပေမယ့် မြို့ရဲ့လုံခြုံရေး မြို့ရဲ့တည်ငြိမ်အေးချမ်းရေးဆိုင်ရာတွေနဲ့ ပတ်သက်ပြီးတော့ ဒီဘက်က ဌာနဆိုင်ရာတွေရော ကျွန်တော်တို့အဖွဲ့အစည်းတွေရော တပ်မတော်တပ်ရင်းတပ်ဖွဲ့တွေရော အကုန်လုံး စွမ်းစွမ်းတမံလုပ်နေတယ်။ ဒေသမှာရှိတဲ့ လူတွေလည်း ပုံမှန်အခြေအနေအတိုင်းပြန်ရဖို့အတွက် ဒေသခံပြည်သူတွေရဲ့ အကျိုးကျေးဇူးအတွက် ဦးစီးအဖွဲ့တွေကနေ ဦးဆောင်ပြီးတော့ အထက်ဌာန အဆင့်ဆင့်ရဲ့ လမ်းညွှန်မှုအတိုင်း တည်ငြိမ်ရေး၊ တရားဥပဒေစိုးမိုးရေး၊ မြို့တွင်းသန့်ရှင်းသာယာရေးတွေ အပြင် မြို့ထဲမှာရှိတဲ့ ပြည်သူတွေရဲ့ စားဝတ်နေရေးကိစ္စတွေအတွက် အစအဆုံးပုံမှန်ပြန်ဖြစ်အောင် ကျွန်တော်တို့ဌာနတွေအနေနဲ့ ကြိုးစားပြီးတော့ ဆောင်ရွက်ပေးနေပါတယ်။ ကျွန်တော်တို့ လုပ်ဆောင်ချက်တွေကို ဒေသခံတွေက ယုံကြည်လား၊ မယုံကြည်လား ဆိုတာကတော့ မြို့နယ်ထဲကိုပြန်ဝင်လာတဲ့ ဒေသခံအရေအတွက်ကိုကြည့်ပြီး သိနိုင်ပါတယ်ပေါ့။ လက်ရှိတော့ ဒေသတွင်းအေးအေးချမ်းချမ်းနဲ့ ရှိနေပါတယ်။ ကျွန်တော်တို့လည်း အားလုံးအတွက် အကောင်းဆုံးဖြစ်အောင် ကြိုးစားပြီးတော့ လုပ်နေပါတယ်။ လက်ရှိအခြေအနေကလည်း ဒေသထဲမှာ ဘာမှထူးခြားမှုမရှိပါဘူး။ အေးချမ်းသာယာပါတယ်။

TNA။ ကျေးဇူးတင်ပါတယ်။

တွေ့ဆုံမေးမြန်းသူ။ နဖြေိုးမြင့်
ဓာတ်ပုံ - ခမ်းဦး