~~~~~~~~⊰❂ unicode ❂⊱~~~~~~~~

ပဒါန်းကျေးရွာတွင် တရားမဝင် ပိတောက်သားသစ်များ ဖမ်းဆီးရမိ
...............

တရားမဝင် ပိတောက်သား ၉ တန်ခွဲကျော် သယ်ဆောင်လာသော ယာဉ်အား ယာဉ်မောင်း၊ ယာဉ် နောက်လိုက်နှင့်တကွ ဧပြီလ (၂၃)ရက်နေ့ညပိုင်းက မကွေးတိုင်းဒေသကြီး၊ ပဒါန်းကျေးရွာတွင် ဖမ်းဆီးရမိခဲ့ပြီး သစ်ပိုင်ရှင်ကိုပါ ဖော်ထုတ်နိုင်ခဲ့ကြောင်း ငဖဲမြို့ နယ်သစ်တောဦးစီးဌာနမှ သိရသည်။

“ပဒါန်းကျေးရွာ စာတတ်ကူမောင်းတံဂိတ်မှာတားပြီး စစ်ဆေးခဲ့ရာမှာ တရားမဝင်သယ်ဆောင်လာတဲ့ ပိတောက်သားသစ် ကိုးတန်ခွဲကျော်ကို ယာဉ်မောင်း၊ယာဉ်နောက်လိုက်နဲ့တကွ တွေ့ရှိဖမ်းဆီးနိုင်ခဲ့တာပါ” ဟု ငဖဲမြို့နယ် သစ်တောဦးစီးဌာနမှ သစ်တောဦးစီးမှူး ဦးအောင်မင်းသူက တာချီလိတ်သတင်း အေဂျင်စီသို့ ပြောသည်။

မကွေးတိုင်းဒေသကြီး မင်းဘူးခရိုင် ငဖဲမြို့နယ် ပဒါန်းကျေးရွာ စာတတ်ကူမောင်းတံဂိတ်၌ ဧပြီလ (၂၃) ရက်နေ့ ညနေ (၆) နာရီ (၂၅) မိနစ်အချိန်ခန့်တွင် တရားမဝင် ပိတောက်သားသစ်များ သယ်ဆောင်လာသော ယာဉ်ကို တားဆီးစစ်ဆေးနိုင်ခဲ့သဖြင့် ကျပ်(၂၄)သိန်းကျော် တန်ဖိုးရှိသော သစ်တန်ချိန် (၉.၆၅၃၈)တန် အား တွေ့ရှိသိမ်းဆည်းရမိခဲ့ခြင်းဖြစ်ကြောင်း သိရသည်။

အဆိုပါ သစ်များကို သယ်ဆောင်လာသော ယာဉ်မောင်း၊ ယာဉ်နောက်လိုက်နှင့် သစ်ပိုင်ရှင်တို့အား ငဖဲမြို့မရဲစခန်းတွင် (ပ)၆၈/၂၀၁၇၊ ပြည်သူပိုင်ပစ္စည်းကာကွယ်ရေးဥပဒေပုဒ်မ ၆(၁) ဖြင့် အမှုဖွင့် အရေးယူဆောင်ရွက်လျက်ရှိကြောင်း သိရသည်။

သတင်း - ဖီးနစ်