ရှမ်းပြည်နယ်(တောင်ပိုင်း) ဓနုကိုယ်ပိုင်အုပ်ချုပ်ခွင့်ရဒေသများတွင် နိုင်ငံသားစိစစ်ရေးကတ်ရရှိရေးအတွက် NRC အဖွဲ့က အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ လူဝင်မှုကြီးကြပ်ရေးနှင့် အမျိုးသားမှတ်ပုံတင်ရေးဦးစီးဌာနနှင့် ချိတ်ဆက်ကာ ကျေးရွာများအထိ ကူညီပေးနေကြောင်း သိရသည်။

ရှမ်းပြည်နယ်(တောင်ပိုင်း) ပအိုဝ်းနှင့် ဓနုကိုယ်ပိုင်အုပ်ချုပ်ခွင့်ရဒေသများတွင် နိုင်ငံသားစိစစ်ရေးကတ် ပြုလုပ်ရေး အတွက် နော်ဝေနိုင်ငံ ဒုက္ခသည်အရေးကူညီနေသော အဖွဲ့ဖြစ်သည့် NRC (Norwegian Refugee Council )က ကိုယ်ပိုင်အုပ်ချုပ်ခွင့်ရဒေသ ဥက္ကဌများကို ချိတ်ဆက်ပြီး ကျေးရွာများ အထိ ဆင်းကာ နိုင်ငံသားစိစစ်ရေးကတ်အတွက် လိုအပ်သည့် စာရွက်စာတမ်းများ မိတ္တူကူးပေးခြင်း၊ ဓာတ်ပုံရိုက်ခြင်း၊ ကျသင့်ငွေပေးသွင်းခြင်းများအား ဆောင်ရွက်ပေးနခြေင်းဖြစ်ကြောင်း သိရသည်။

“ကိုယ်ပိုင်အုပ်ချုပ်ခွင့်ရဒေသတွေမှာ သူတို့အဖွဲ့က ဦးစားပေးလုပ်ပေးတယ်။ ပအိုဝ်းကိုယ်ပိုင်နေရာတော့ ပြီးသွားပြီ ဆိုတော့ အခုဒီနှစ်မှာ ဓနုဒေသတွေမှာ ပြုလုပ်ပေးနေပါတယ်။ တခြား မြို့နယ်တွေကျတော့ ကျွန်မတို့ ဌာနကနေပဲ သွားရောက်လုပ်ပေးပါတယ်”ဟု ခရိုင် လူဝင်မှုကြီးကြပ်ရေးနှင့် အမျိုးသားမှတ်ပုံတင်ရေးဦးစီးဌာန ဦးစီးအရာရှိ ဒေါ်နန်းခမ်းဦးထံမှ သိရသည်။

NRC အဖွဲ့သည် ဒေသခံများ နိုင်ငံသားစိစစ်ရေးကတ်ပြားရရှိရေးအတွက် ကူညီဆောင်ရွက်ပေးခြင်းကို ရှမ်းပြည်နယ်(တောင်ပိုင်း) ပအိုဝ်းကိုယ်ပိုင်အုပ်ချုပ်ခွင့်ရ ဒေသများဖြစ်သည့် ဟိုပုံး၊ ပင်လောင်း၊ ဆီဆိုင်၊ ကျောက်တစ်လုံး၊ နောင်တယားဒေသများတွင် ၂၀၁၃ ခုနှစ်မှစ၍ လုပ်ဆောင်ပေးခဲ့ကာ လက်ရှိတွင် ဓနုကိုယ်ပိုင် အုပ်ချုပ်ခွင့်ရဒေသများအပြင် ကရင်နှင့် ကယားပြည်နယ်များတွင်လည်း ဆောင် ရွက်ပေးနေကြောင်း သိရသည်။

သတင်း - နိုနို