~~~~~~~~⊰❂ unicode ❂⊱~~~~~~~~

ကျပ်သိန်းပေါင်း (၅၆၅)သိန်း အကုန်အကျခံ ဆောက်လုပ်ထားသည့် ရတနာပွင့်လှ ကန်တော်ကြီးဖြတ်ကူးတံတားသစ် ဖွင့်လှစ်
.................

မကွေးတိုင်းဒေသကြီး၊ တောင်တွင်းကြီးမြို့တွင် သစ်သားတံတားအိုကြီးအား ဖျက်ကာ ကျပ်သိန်းပေါင်း (၅၆၅)သိန်း ကုန်ကျခံ၍ သံကူကွန်ကရစ်တံတား သစ်အဖြစ် ဆောက်လုပ်ပြီးစီးခြင်း အထိမ်းအမှတ် ဖွင့်ပွဲ အခမ်းအနားကို ကန်တော်ကြီးတံတား၏ အရှေ့ဘက်တံတားအခြေတွင် ဧပြီလ(၂၉)ရက်နေ့ နံနက်ပိုင်းက ကျင်းပပြုလုပ်ကြောင်း သိရသည်။

"တိုင်းဒေသကြီးအစိုးရ ရန်ပုံငွေများကို မြို့နယ်ဖွံ့ဖြိုးရေး နဲ့ စည်ပင်သာယာရေးကိစ္စများမှာ အကျိုးရှိစွာ ခွဲဝေအသုံးချနိုင်ခဲ့တဲ့အတွက် ယခုလို လှပခိုင်ခန့်တဲ့ တံတားအသစ်ကြီး အမြန်ဆုံး တည်ဆောက် ပေးနိုင်ခဲ့ခြင်း ဖြစ်ပါတယ်”ဟု တောင်တွင်းကြီးမြို့နယ် စည်ပင်သာယာရေးကြီးကြပ်မှုကော်မတီ ဥက္ကဌ ဦးတင်လှ က ဆိုသည်။

အဆိုပါ တံတားသည် ယခင်က သစ်သားတံတားအိုကြီးအဖြစ်ရှိနေရာမှ မကွေးတိုင်းဒေသကြီး အစိုးရရန်ပုံငွေမှ ငွေကျပ်သိန်း(၄၀၀)၊ Aung Foundation Group Co,ltd မှ ငွေကျပ်သိန်း (၁၄၀) နှင့် ပုဏ္ဏဝတီဂေါက်ကလပ်အဖွဲ့ဝင်များမှ ငွေကျပ်(၂၅) သိန်း စုစုပေါင်း ငွေကျပ်သိန်းပေါင်း (၅၆၅) သိန်း အကုန်အကျခံတည်ဆောက်ခဲ့ခြင်း ဖြစ်ကြောင်း သိရသည်။

ရတနာပွင့်လှ ကန်တော်ကြီး ဖြတ်ကူးတံတားသစ် ဖွင့်ပွဲသို့ တိုင်းဒေသကြီးအစိုးရအဖွဲ့မှ စီမံကိန်း၊ ဘဏ္ဍာရေးနှင့်စည်ပင်သာယာရေးဝန်ကြီး ဦးဇော်မင်း၊ မကွေးတိုင်းဒေသကြီး လွှတ်တော် ဒု-ဥက္ကဌ ဦးဇော်မျိုးဝင်း၊ တောင်တွင်းကြီးမြို့နယ် အမျိုးသားဒီမိုကရေစီအဖွဲ့ချုပ် လွှတ်တော်ကိုယ်စားလှယ်များနှင့် ပါတီဝင်များ၊ ဌာနဆိုင်ရာအသီးသီးမှတာဝန်ရှိသူများ၊ မြို့ခံပြည်သူများတက်ရောက်ခဲ့ကြောင်း သိရသည်။

သတင်း - ဖီးနစ်
ဓာတ်ပုံ - အေကေကေ(တောင်တွင်းကြီး)