~~~~~~~~⊰❂ unicode ❂⊱~~~~~~~~

တာချီလိတ်တွင် သင်္ကြန်အတွင်း ပိတ်ရက်ကြောင့် မီတာခ ပေးဆောင်မှုကို မီးလင်းရေးရုံး နှစ်ရုံးလုံးမှ မေလ(၅)ရက်နေ့အထိ နောက်ဆုံး သတ်မှတ်ပေးထား
........

တာချီလိတ်မီးလင်းရေးရုံး နှစ်ရုံးသည် သင်္ကြန်ကာလအတွင်း ပိတ်ရက်များကြောင့် မတ်လအတွင်း အသုံးပြုခဲ့သော မီတာခ ကျသင့်ငွေများအား မူလနောက်ဆုံး သတ်မှတ်ရက် ဖြစ်သည့် ဧပြီလ(၂၅)ရက်နေ့ အစား မေလ(၅)ရက်နေ့အထိ ပေးဆောင်နိုင်ရန် ရက်တိုးမြှင့်သတ်မှတ်ထားကြောင်း သိရသည်။

တာချီလိတ်မြို့ ပုန်းထွန်ရပ်ကွက် မှ ဆန်ဆိုင်း(ခ)ရပ်ကွက် မီးလိုင်းများနှင့် သက်ဆိုင်သည့် တာချီလိတ်ရွှေတိဂုံ အဆင်းလမ်းရှိ မီးလင်းရေးရုံးတွင် မူလသတ်မှတ်ထားသည့် (၂၅)ရက်နေ့ နောက်ဆုံး အစား မေလ(၅)ရက်နေ့အထိ ပေးဆောင်နိုင်မှာ ဖြစ်ကြောင်း နှင့် စနေ၊ တနင်္ဂေနွနေ့များသည် ပုံမှန်အတိုင်း ပိတ်ရက်ဖြစ်ကြောင်း သိရသည်။

"သင်္ကြန်အတွင်းက ပိတ်ရက်ရှည်ဖြစ်ထားတဲ့အတွက် ကျွန်တော်တို့ သတ်မှတ်ထားတဲ့ ရက်အတိုင်းဆိုရင် လာဆောင်သူတွေအတွက် အခက်အခဲ ဖြစ်စေမှာကြောင့် ဒီလ တစ်လတည်းအတွက် မေလ(၅)ရက်နေ့ နောက်ဆုံးထားပြီး ပေးဆောင်နို်င်ရန် ရက်ထပ်တိုးပေးထားပါတယ်။"ဟု တာချီလိတ်ရွှေတိဂုံ အဆင်းလမ်းရှိ မီးလင်းရေးရုံး ပြင်ပဆက်ဆံရေးတာဝန်ခံ ဦးစိုင်းခမ်းမွန်းက ပြောသည်။

ယခုလို ရက်တိုးမြှင့်ပေးထားမှုသည် သင်္ကြန်ကာလအတွင်းက ပိတ်ရက်ရှည်ကြောင့် ရုံးဖွင့်ချိန်တွင် မီတာခ လာရောက်ပေးဆောင်သူများ များပြားကာ အချိန်ကြန့်ကြာမှုများ ဖြစ်စေသည့်အတွက် ရက်ထပ်တိုးပေးလိုက်ခြင်း ဖြစ်ကြောင်း နှင့် ယခု တစ်လတည်းအတွက်သာ ဖြစ်ကြောင်း သိရသည်။

"ကျွန်တော်တို့ ရုံးဘက်ကတော့ သင်္ကြန်ကာလ ပိတ်ရက်ကြောင့် စနေ တနင်္ဂေနွကို မပိတ်ဘဲနဲ့ မီတာဆောင်တာတွေကို လက်ခံပေးခဲ့ပါတယ်။ ဒီလကလည်း သင်္ကြန်ပိတ်ရက်ဖြစ်တဲ့အတွက် ကျွန်တော်တို့လည်း မေလ(၅)ရက်နေ့အထိ သတ်မှတ်ပေးထားပါတယ်၊ အခုလို ရက်တိုးသတ်မှတ်ပေးမှုက ဒီတလတည်းအတွက်ပါ။" ဟု တာချီလိတ် မီးလင်းရေးကော်မတီ(ရုံးခွဲ)( တောဝမီးစက်အတွင်းရှိ ရုံး)မှ ပြင်ပဆက်ဆံရေးတာဝန်ခံ ကိုဟိန်းကိုက ပြောသည်။

တာချီလိတ်ရှိ မီးလင်းရေးရုံးများတွင် မီတာခ ပေးဆောင်မှုကို လစဉ် (၁၀)ရက်နေ့မှ စ၍ လစဉ် (၂၄-၂၅)ရက်နေ့အထိ ပေးဆောင်နိုင်ပြီး သတ်မှတ်ရက်ထက် ကျော်လွန်သွားပါက ဒဏ်ငွေပေးဆောင်ရခြင်း အပြင် သတ်မှတ်ရက်ထက် ပိုမိုကျော်လွန်သွားပါက မီတာသုံးစွဲခွင့် ခေတ္တဖြတ်တောက်ထားခြင်းများကို ပြုလုပ်သွားရန်အတွက် စည်းကမ်းများ သတ်မှတ်ထားရှိကြောင်း သိရသည်။

သတင်း - ကိုဇောင်း