~~~~~~~~⊰❂ unicode ❂⊱~~~~~~~~

မြစိမ်းရောင်ချေးငွေမှရသည့် အမြတ်ငွေများကို ကျောင်းဆရာမများအတွက် နေအိမ်ဆောက်ပေးရန် မိုင်းဆတ်၌ ပြုလုပ်သည့် စီမံကိန်းသုံးသပ် ဆွေးနွေးပွဲတွင် တင်ပြ
http://www.tachileik.net/2017/04/MSY.html
**********

မြစိမ်းရောင်ကျေးရွာ စီမံကိန်းများနှင့် ပတ်သက်၍ မြို့နယ်အဆင့် မြစိမ်းရောင် ကျေးရွာ စီမံကိန်းသုံးသပ် ဆွေးနွေးပွဲကို ရှမ်းပြည်နယ်(အရှေ့ပိုင်း)၊ မိုင်းဆတ်မြို့တွင် ဧပြီလ(၂၀)ရက်နေ့ နံနက်(၉)နာရီအချိန်က မိုင်းဆတ်ခရိုင်ကျေးလက်ဒေသဖွံ့ဖြိုးတိုးတက်ရေးဦးစီးဌာနရုံးတွင် ကျင်းပပြုလုပ်ကြောင်း သိရသည်။

အဆိုပါ ဆွေးနွေးပွဲတွင် ချေးငွေမှ ရရှိလာသော အမြတ်ငွေများကို ကျောင်းဆရာမများအတွက် နေထိုင်ရန် နေအိမ် ဆောက်လုပ်ပေးရန်ကိစ္စရပ်အား သက်ဆိုင်ရာ ကော်မတီဝင်က ဆွေးနွေးတင်ပြကြောင်း သိရသည်။

မြစိမ်းရောင် ချေးငွေမှ ရရှိလာသော အမြတ်ငွေများကို စု၍ ကျောင်းဆရာမများ နေထိုင်ရန်အတွက် လိုအပ်နေသည့် နေအိမ်များ ဆောက်လုပ်ပေးစေလိုကြောင်းနှင့် မြစိမ်းရောင်ကျေးရွာ ရန်ပုံငွေ ကြီးကြပ်မှု ကော်မတီဝင်များက လုပ်ငန်းများ ဆောင်ရွက်ရာတွင် တွေ့ကြုံရသော အခက်အခဲများကြောင့် ကော်မတီအသစ် ပြန်လည်ဖွဲ့စည်းပြီး သင်တန်းများ ဖွင့်လှစ်ပေးရန်လိုအပ်ကြောင်း မိုင်းဆတ်မြို့နယ် ဝမ်ကောင်းကျေးရွာ မြစိမ်းရောင်ကော်မတီဝင် ဦးစိုင်းနွံက ဆွေးနွေးတင်ပြလိုက်ခြင်း ဖြစ်သည်။

ဆွေးနွေးပွဲ၏ ကနဦးတွင် ရှမ်းပြည်နယ်လွှတ်တော်ကိုယ်စားလှယ် ဦးစိုင်းခတ္ထိယနှင့် မိုင်းဆတ်ခရိုင် ကျေးလက်ဒေသဖွံ့ဖြိုးတိုးတက်ရေး ဦးစီးဌာန၊ ခရိုင်ဦးစီးမှူး ဦးအောင်လွင်က အဖွင့်အမှာစကား ပြောကြားပြီး မြို့နယ်ကျေးလက်ဒေသဖွံ့ဖြိုးတိုးတက်ရေး ဦးစီးဌာနမှ မြို့နယ်ဦးစီးမှူး ဦးစိုင်းစိုးစိုးက မြစိမ်းရောင်ကျေးရွာဆိုင်ရာလုပ်ငန်းများ ဆောင်ရွက်မှု အခြေအနေများကို ရှင်းလင်းဆွေးနွေးခဲ့ကြသည်။

သတင်း/ဓာတ်ပုံ - ယဉ်ယဉ်ဝင်း