~~~~~~~~⊰❂ unicode ❂⊱~~~~~~~~
နေအိမ်ခြံဝင်းအတွင်း ပန်းပင်စိုက်ရန် မြကြေီးတူးရာမှ လက်ပစ်ဗုံးဟောင်းတွေ့ရှိ

နေအိမ်ခြံဝင်းအတွင်း ပန်းပင်စိုက်ရန် ဧပြီလ(၁၀)ရက်နေ့ နံနက်ပိုင်းက မြကြေီးတူးရာမှ စနက်တံ မပြုတ်သေးသည့် လက်ပစ်ဗုံး နှစ်လုံး တွေ့ရသဖြင့် သက်ဆိုင်ရာသို့ အကြောင်းကြား အကူအညီတောင်းထားကြောင်း သိရသည်။

“အမှတ် (၂) ရဲစခန်းက ဗုံးနှစ်လုံးကို လာပြီးတော့ သိမ်းသွားပါပြီ။ စရဖလည်းပါတယ်။ နောက်ထပ်လည်း သူတို့ ကိရိယာတွေနဲ့ ထပ်ပြီး စစ်ဆေးပေးမယ်ပြောတယ်။ အခုထိတော့ ထပ်လာမစစ်သေးဘူး”ဟု အဆိုပါ နေအိမ်မှ ဒေါ်ကြူကြူပွေးက တာချီလိတ်သတင်းအေဂျင်စီသို့ ပြောသည်။

ရှမ်းပြည်နယ်တောင်ပိုင်း၊ တောင်ကြီးမြို့၊ ညောင်ပင်သာရပ်၊ ညောင်ပင်ကြီးလမ်းရှိ ဦးအောင်ပွေး ( ရွှေပန်းထိမ် )၏ နေအိမ်ခြံဝင်းအတွင်း ပန်းပင်စိုက်ရန် အတွက် မြေကျင်းတူးရာမှ အနက်နှစ်ပေခန့် အရောက် မာကြောသော အလုံးတစ်ခုကို တူးမိရာမှ လက်ပစ်ဗုံးဖြစ်နေသည်ကို တွေ့ရခြင်းဖြစ်ကြောင်း သိရသည်။

ယင်းနောက် ထပ်မံတူးဖော်ကြည့်ရာ နောက်ထပ် လက်ပစ်ဗုံးတစ်လုံးအား တွေ့ရသဖြင့် သက်ဆိုင်ရာ ရပ်ကွက်အုပ်ချုပ်ရေးမှူးရုံးမှ တဆင့် အကြောင်းကြား အပ်နှံလိုက်ခြင်းဖြစ်ကြောင်း သိရသည်။

သက်ဆိုင်ရာတာဝန်ရှိသူများက လာရောက်စစ်ဆေးရာ အဆိုပါလက်ပစ်ဗုံးများမှာ စနစ်တံ မပြုတ်သေးသော သက်ရှိဗုံးများဖြစ်ကြောင်း သိရသည်။

အဆိုပါ နေအိမ်ခြံဝင်းတွင် အိမ်ဆောက်ရန်အတွက် ၁၉၈၃ ခုနှစ်က မြေတူးစဉ်ကလည်း လက်ပစ်ဗုံးအဟောင်းများ၊ ကျည်ဆန်အခွံများ၊ လက်နက်ကြီးကျည်များ တွေ့ခဲ့ရဖူးကြောင်း သိရသည်။

သတင်း - ချယ်ရီထိုက်
ဓာတ်ပုံ - Photo: Kyu Kyu Pway