~~~~~~~~⊰❂ unicode ❂⊱~~~~~~~~
တာချီလိတ်မြို့၊ ပုန်းထွန်ရပ်ကွက်၊ စိန်ပန်းလမ်းတွင် စည်ပင်သာယာရေးဌာန၏ အမှိုက်ပုံး ထားရာနေရာအား လူနေအိမ်များရှေ့သို့ ရွှေ့ပြောင်းလာသဖြင့် မူလနေရာသို့ ပြန်လည်ရွှေ့ပြောင်းပေးရန် ရပ်ကွက်နေလူထုက တင်ပြထားမှုအား မတ်လ တတိယပတ်အတွင်း ဖြေရှင်းသွားမည်ဖြစ်ကြောင်း သိရသည်။
“ကျွန်တော်တို့ ဆီကို တင်ပြတဲ့စာက မြို့နယ်အထွေထွေ အုပ်ချုပ်ရေးဦးစီးဌာနကနေ ဒီကနေ့ (မတ်လ ၁၃ ရက်နေ့)မှ ရတာပါ။ ဒီရက်ပိုင်းအတွင်းမှာပဲ အမှိုက်ပုံးကို မူလနေရာနား ပြန်ရွှေ့ပေးသွားမှာပါ”ဟု တာချီလိတ်မြို့နယ် စည်ပင်သာယာရေးဌာနမှ တာဝန်ရှိသူတစ်ဦးက ပြောသည်။
အဆိုပါ အမှို်က်ပုံးအား ယခင်ထားသည့် နေရာမှ ဆယ်ပေခန့်အကွာရှိ လူနေအိမ် မျက်နှာစာများသို့ ရွှေ့ပြောင်းထားသည်မှာ (၃)လကျော်ပြီဖြစ်ကြောင်း အဆိုပါ ရပ်ကွက်နေ ပြည်သူများထံမှ သိရသည်။
“အမှိုက်ပုံးက ဟိုးအရင်ကတည်းက ထားတဲ့နေရာကနေ ကျွန်မတို့ အိမ်မျက်နှာစာဖက်ကို ရွှေ့လိုက်တာပါ။ အရင်ထားတဲ့ နေရာမှာက ရေသန့်စက်ရုံရှိတော့ သူတို့ကားတွေထားဖို့ အမှိုက်ပုံးရွှေ့လိုက်တော့ ကျွန်မတို့အိမ် မျက်နှာစာဖက်ကို ရောက်လာတာပါ။ နေ့စဉ်နဲ့ အမျှဆိုတော့ အဆင်မပြေလို့ ပြန်ရွှေ့ပေးဖို့ ပြောတော့ တိုင်ချင်တဲ့နေရာတိုင် စည်ပင်ရုံးကလူကြီးတွေလည်း ပိုင်တယ်လို့ပြောပြီး မရွှေ့ပေးတာပါ။ ကျွန်မတို့ ရပ်ကွက်ရုံးလည်း ပြောပါတယ်။ စည်ပင်ကိုလည်း စာတင်ထားတာ ကြာပါပြီ”ဟု စိန်ပန်းလမ်းတွင် နေထိုင်သူ အမျိုးသမီးက ပြောသည်။
စည်ပင်သာယာရေးဌာနနှင့် ပုဂ္ဂလိက အမှိုက်သိမ်းဝန်ဆောင်မှုလုပ်ငန်း နှစ်ပိုင်းခွဲ၍ တာဝန်ယူနေသည့် တာချီလိတ်မြို့တွင် အဆိုပါ စိန်ပန်းလမ်းမှာ စည်ပင်သာယာရေးဌာနမှ အမှိုက်သိမ်းသည့် နယ်မြဖြေစ်ပြီး နေ့စဉ် အမှိုက်သိမ်းပေးနေကြောင်း သိရသည်။
သတင်း - ချယ်ရီထိုက်
