မကွေးသင်္ကြန်ပွဲတော်အတွက် မဏ္ဍပ်ဆောက်လုပ်ရန် လျှောက်ထားသူ မရှိသေး
************

မကွေးတိုင်းဒေသကြီး မကွေးမြို့တွင် သင်္ကြန်ပွဲတော်အတွက် တိုင်းဒေသကြီးအစိုးရမှ ညွှန်ကြားချက်ထုတ်ပြန်ထားခြင်းမရှိသည့်အပြင် မဏ္ဍပ်ဆောက်လုပ်ခွင့်လျှောက်ထားသူလည်း မရှိသေးကြောင်း မကွေးမြို့နယ်စည်ပင်အမှုဆောင်အရာရှိထံမှ သိရသည်။
“အစိုးရအဖွဲ့ကလည်း သင်္ကြန်ကျင်းပနိုင်ရေးအတွက် ဘာညွှန်ကြားချက်မှ မရှိသေးပါဘူး။ ဌာနဆိုင်ရာတွေနဲ့ ပုဂ္ဂလိကတွေအနေနဲ့ကလည်း သင်္ကြန်မဏ္ဍပ်ဆောက်လုပ်ဖို့အတွက် လျှောက်ထားတာ ဒီနေ့အထိ တစ်ခုမှ မရှိသေးပါဘူး” ဟု မကွေးမြို့နယ်စည်ပင်အမှုဆောင်အရာရှိ ဦးထင်အောင်က ပြောသည်။
ယခင်နှစ်များက မကွေးမြို့သင်္ကြန်ပွဲတော်အား ဗဟိုမဏ္ဍပ်၊ ဌာနဆိုင်ရာမဏ္ဍပ်များ၊ ပုဂ္ဂလိကမဏ္ဍပ်များနှင့် မြို့နယ်(၆)ခုမှ အလှ ပြယာဉ်များဖြင့် ကျင်းပလေ့ရှိခဲ့သော်လည်း ၂၀၁၆ ခုနှစ်မှစ၍ ဌာနဆိုင်ရာမဏ္ဍပ်များနှင့် ဗဟိုမဏ္ဍပ်များ ဆောက်လုပ်ခြင်းမရှိခဲ့ကြောင်း ဒေသခံများထံမှ သိရသည်။
“ကျွန်တော်တို့က လူငယ်တွေဆိုတော့ သင်္ကြန်ပွဲတော်ကို စည်စည်ကားကားကျင်းပနိုင်ခြင်း မရှိတော့ဘူး ဆိုတဲ့အပေါ်မှာ စိတ်မကောင်းဖြစ်ရတာပေါ့ဗျာ။ အစဉ်အလာပျက်သွားမှာကိုလည်း စိုးရိမ်မိတယ်။ ပြီးခဲ့တဲ့နှစ်က အစိုးရအကူးအပြောင်းမို့ အခက်အခဲရှိတာကိုတော့ နားလည်ပေးလို့ရပါတယ်”ဟု သိင်္ဂါဂီရိ ရပ်ကွက် နေသူ ကိုချမ်းမြေ့ဇော်က ပြောသည်။
မကွေးမြို့နယ်စည်ပင်သာယာရေးအဖွဲ့အနေဖြင့် ပုဂ္ဂလိကမဏ္ဍပ်များ လျှောက်လာမည်ဆိုပါက စိစစ်ခွင့်ပြုသွားမည်ဖြစ်ကြောင်း သိရသည်။
“ညွှန်ကြားချက်မရသေးဘူးဆိုပေမဲ့ ထုံးစံအတိုင်း ပုဂ္ဂလိက သင်္ကြန်မဏ္ဍပ်များဆောက်လုပ်ချင်တယ်ဆို ရင် ဆောက်လုပ်မယ့်နေရာ၊ အတိုင်းအတာနဲ့ ဖော်ပြပြီး မြို့နယ်စည်ပင်သာယာရေးကော်မတီကို လျှောက်လွှာတင်မယ်ဆိုရင် ခွင့်ပြုပေးမှာပါ။ ဒါပေမဲ့ အခု ဆောက်လုပ်နေဆဲ နိုင်လွန်ကတ္တရာလမ်းတွေပေါ်မှာတော့ ခွင့်ပြုမှာမဟုတ်ပါဘူး”ဟု မကွေးမြို့နယ်စည်ပင်အမှုဆောင်အရာရှိ ဦးထင်အောင်က ပြောသည်။
မကွေးမြို့၏ အဓိကလမ်းမကြီးများဖြစ်သည့်  ပြည်တော်သာလမ်း၊ မဲထီးလမ်း၊ အ.ထ.က (၁)လမ်း၊ မြို့မစျေးလမ်းနှင့် ဗိုလ်ချုပ်လမ်းတို့အား နိုင်လွန်ကတ္တရာလမ်းများ ခင်းနေသဖြင့် အဆိုပါနေရာများတွင် သင်္ကြန်မဏ္ဍပ်များ တည်ဆောက်ခွင့်ပြုမည်မဟုတ်ကြောင်း သိရသည်။

သတင်း၊ ဓါတ်ပုံ # ဖီးနစ်