ငြိမ်းချမ်းရေးရမည့်အချိန်ကို မျှော်လင့်ချက်ကြီးကြီးမထားရန် KNPP ဒု ဥက္ကဌဆို
************
မကြာမီကာလအတွင်း ငြိမ်းချမ်းရေးရမည်ဟု မျှော်လင့်လုပ်ဆောင်နေသော်လည်း ပြည်သူများအနေဖြင့် မျှော်လင့်ချက်ကြီးကြီးမထားမိရန် ကရင်နီအမျိုးသားတိုးတက်ရေးပါတီ(KNPP)ဒုဥက္ကဌခူးဦးရယ်က ကရင်နီနှစ်သစ်ကူးနေ့တွင် ပြောကြားလိုက်သည်။

 “ကျွန်တော်တို့ မျှော်လင့်နေတဲ့ ငြိမ်းချမ်းရေးရဖို့ နီးသလား ဝေးသးလားလို့မေးရင် ကျွန်တော် တိတိကျကျ မပြောနိုင်ပါဘူး။ ကျွန်တော့့်အနေနဲ့ ပြောနိုင်တာကတော့ မကြာသောကာလမှာ မျှော်လင့်နေတဲ့ငြိမ်းချမ်းရေး ဟာ မနှေးမမြန်ရလာတော့မယ်လို့ မျှော်လင့်ပါတယ်။ ရအောင်လည်း ဆက်ပြီး ကြိုးပမ်းပါမယ်။ သို့သော် ဒီနေရာမှာ မိဘပြည်သူများကို ကျွန်တော်အသိပေးလိုတာကတော့ မျှော်လင့်ချက်မထားပါနဲ့လို့ ကျွန်တော် မတားလိုသလို မျှော်လင့်ချက်ကြီးကြီးထားပါလို့လည်း ကျွန်တော်မတိုက်တွန်းလိုဘူး။ ကျွန်တော်တို့ တန်ရာတန်ရာ စဉ်းစားပြီးတော့ တန်ရာတန်ရာ ဆက်သွားရမှာပဲ ဖြစ်ပါတယ် ”ဟု ကရင်နီနှစ်သစ်ကူးနေ့တွင် ခူးဦးရယ်က ပြောဆိုလိုက်သည်။

ယခင်အစိုးရလက်ထက်က စတင်လာသည့် ငြိမ်းချမ်းရေးလုပ်ငန်းစဉ်အား ယခုအစိုးရလက်ထက်တွင် အမြန်ဆုံး ဖော်ဆောင်နိုင်ရေး လုပ်ဆောင်နေပြီး KNPP အနေဖြင့် မည်သည့်အစိုးရအဖွဲ့ဖြင့်ဖြစ်စေ ငြိမ်းချမ်းရေးရသည် အထိ လုပ်ဆောင်သွားမည်ဟု ဆုံးဖြတ်ထားကြောင်း ခူးဦးရယ်က ဆိုသည်။

“ကျွန်တော်တို့က လူမသိသူမသိစားပွဲဝိုင်းမှာကျိတ်ပြီးတော့ နိုင်ငံရေးကစားနေကြသလား။အတိုင်အဖောက် လုပ်နေကြသလားလို့ ပြည်သူလူထုက အဲဒီလိုအမြင်တွေရှိနေတယ်လို့ ကျွန်တော်ရိပ်မိပါတယ်။ အဲဒီတော့ ကျွန်တော်တို့ ဝိုးတိုးဝါးတား ဝိုင်းကျိတ်ပြီးတော့ မကောင်းကြံနေတာမရှိပါဘူး။ ကြံချင်တဲ့သူတွေ ရှိကောင်းရှိမယ်။ ကျွန်တော် အာမ မခံပါဘူး”ဟု ခူးဦးရယ်က ဆိုသည်။

လက်ရှိတွင် တိုင်းရင်းသားလက်နက်ကိုင်အဖွဲ့အများစုကအပစ်ရပ်သဘောတူညီမှုဖြင့် ငြိမ်းချမ်းရေးဆွေးနွေးမှုများ လုပ်ဆောင်နေသော်လည်း  တစ်နိုင်ငံလုံးအတိုင်းအတာ ပြည်တွင်းငြိမ်းချမ်းရေး ရရှိရေးကို ပြည်သူများအနေဖြင့် မျှော်လင့်ချက် ကြီးစွာထားနေကြောင်း လွိုင်ကော်မြို့မှ ဒေသခံ ကိုဆူးရယ် က ပြောသည်။

“မငြိမ်းချမ်းတဲ့ ဒေသမှာ ရှင်သန်လာသူတွေကတော့ ငြိမ်းချမ်းရေးအပေါ်ကိုတော့ မျှော်လင့်ချက်ကြီး မိတာ မှားသလားပေါ့။ တိုင်းရင်းသားလက်နက်ကိုင်နဲ့ အစိုးရ သူတို့လုပ်နေတဲ့ ငြိမ်းချမ်းရေး ကတိကဝတ်တွေ မလိုက်နာမှုစတဲ့ အချက်တွေကို မြင်နေရတော့ ဒီအပေါ် သံသယ ရှိတာတော့ ဟုတ်ပါတယ်။ စစ်မှန်တဲ့ ငြိမ်းချမ်းရေးကို အနာဂတ် တိုင်းပြည်အတွက် သားသမီးတွေအတွက်နှစ်ဖက်လုံးသဘောထားကြီးပြီး ဖော်ဆောင် ပေးကြပါလို့ပဲ တိုက်တွန်းချင်တယ် ”ဟု ကိုဆူးရယ်က ပြောသည်။

လက်ရှိငြိမ်းချမ်းရေးဆွေးနွေးမှုတွင် ပါဝင်ဆွေးနွေးနေသည့် KNPP အနေဖြင့်ငြိမ်းချမ်းရေးရသည်အထိလုပ် ဆောင်သွားရန် ဆုံးဖြတ်ထားပြီး ပြည်သူလူထုကလည်း ပူးပေါင်းပါဝင်ပေးကြရန် ကရင်နီအမျိုးသားတိုးတက်ရေးပါတီ ဒုဥက္ကဌ ဖြစ်သူ UNFC အထွေထွေအတွင်းရေးမှူးလည်းဖြစ်သည့် ခူးဦးရယ်က တိုက်တွန်းထားသည်။

၁၉၅၇ ခုနှစ်တွင် စတင်ဖွဲ့စည်းခဲ့သည့် KNPP သည် ၂၀၁၂ ခုနှစ် မတ်လ (၇) ရက်နေ့တွင် အစိုးရနှင့် အပစ်အခတ်ရပ်စဲရေး သဘောတူညီမှုအသစ်ဖြင့် ငြိမ်းချမ်းရေးလုပ်ငန်းစဉ်တွင် ပါဝင်ဆွေးနွေးနေသည့် အဖွဲ့တစ်ဖွဲ့ဖြစ်သည်။

သတင်း၊ ဓါတ်ပုံ #ဆန်းဖြိုးထွန်း