မယ်ဆိုင်မြို့တွင် ငွေဒင်္ဂါးပြားဟောင်းအတု ရောင်းမိသည့်မြန်မာနိုင်ငံသားနှစ်ဦး CNCMC အကူအညီဖြင့် နေရပ်ပြန်နိုင်
************
ထိုင်းနိုင်ငံ မယ်ဆိုင်မြို့မှ ငွေထည်လုပ်ငန်းသို့် ငွေဒင်္ဂါးပြားဟောင်းအတု ရောင်းချသည်ဟု စွပ်စွဲခံရသည့် ရှမ်းပြည်နယ်အရှေ့ပိုင်း မိုင်းဆတ်မြို့နယ် မိုင်းယွန်းကျေးရွာအုပ်စု ပိန်းခမ်းကျေးရွာသားနှစ်ဦးအား မတ်လ (၂၉) ရက်နေ့တွင် တာချီလိတ်မြို့အခြေစိုက် CNCMC က မယ်ဆိုင်မြို့သို့ သွားရောက်ညှိနှိုင်းပေးရကြောင်း သိရသည်။

“သူတို့တွေကလည်း တကယ်ပဲ ရိုးရိုးသားသား မသိလို့ဆိုတော့ ဝယ်ထားတဲ့ငွေပြားတွေအတွက် ပိုက်ဆံကို ပြန်ပေးပါမယ်။ ကျန်တဲ့တစ်ချို့တစ်ဝက်ကိုတော့ နောက်တစ်ခေါက် ပြန်လာပေးပါမယ်ပေါ့။ ဒီလိုညှိနှိုင်းပေးတော့ ဝယ်တဲ့ဆိုင်ရှင်ကလည်း ဒါကို လက်ခံပါတယ်။ ရဲကိုလည်း အကျိုးအကြောင်း ပြောပြရတာပေါ့”ဟု ထိုင်းနိုင်ငံ မယ်ဆိုင်မြို့ရောက် မြန်မာနိုင်ငံသားများအား ကူညီစောင့်ရှောက်ရေးနှင့် စေ့စပ်ညှိနှိုင်းရေးကော်မတီ (CNCMC)၏ လုပ်ငန်းအကောင်အထည်ဖေါ်ရေးကော်မတီ အတွင်းရေးမှူး ဦးစည်သူမောင်က ပြောသည်။

မိုင်းဆတ်မြို့နယ် မိုင်းယွန်းကျေးရွာအုပ်စု ပိန်းခမ်းကျေးရွာနေ မောင်ညီစွာနှင့် မောင်ညီခွက်တို့သည် ထိုင်းနိုင်ငံ မယ်ဆိုင်မြို့ ငွေထည်ဆိုင်တွင် ငွေပြားဟောင်းရောင်းချနိုင်ကြောင်း ဆက်စပ်ပေးမှုကြောင့် တရုတ်နိုင်ငံမှ ဝင်လာသည့် အပေါ်ယံငွေရည်စိမ်ငွေဒင်္ဂါးများအား တစ်ပြားလျှင် ထိုင်းဘတ်(၈၀)နှုံးဖြင့် ဝယ်ယူပြီး ဘတ်(၁၀၀)ဖြင့် မယ်ဆိုင်မြို့သို့ လာရောက်ရောင်းချခဲ့ခြင်းဖြစ်ပြီး ၎င်းတို့အနေဖြင့် အတုအစစ်မခွဲတတ်ကြောင်း ၎င်းတို့နှစ်ဦး၏ ပြောပြချက်အရ သိရသည်ဟု CNCMC က ဆိုသည်။

“သူတို့က မယ်ဆိုင်ကိုရောက်ဖူးတာ နှစ်ကြိမ်ပဲရှိသေးတယ်လို့ပြောတယ်။ သူများက ဆက်စပ်ပေးတာပေါ့။ ဒီမှာ ငွေဟောင်းပြားတွေ ဝယ်တယ်ဆိုတော့ သူတို့က နယ်ကနေ ငွေဟောင်းပြားတွေ လိုက်ဝယ်တယ်။ ဝယ်တဲ့သူက လွန်ခဲ့တဲ့သုံးလေးရက်လောက်က သူတို့ရောင်းထားတာ စစ်လိုက်တော့ အတုတွေ ဖြစ်နေတော့ ရဲကို ကြိုတင်အကြောင်းကြားထားတာပေါ့”ဟု ဦးစည်သူမောင်က ပြောသည်။

အဆိုပါ ငွေပြားဟောင်းများသည် ဝယ်ယူထားသည့် မယ်ဆိုင်မှ ငွေထည်ဆိုင်ပိုင်ရှင်အား မတ်လ (၂၉) ရက်နေ့တွင် ပထမအကြိမ်က ဝယ်ယူထားသည့် ငွေပြားဟောင်း (၉၀)အတွက် ငွေတစ်ချို့တစ်ဝက်အား ပြန်လည်ပေးအပ်ခဲ့ပြီး ကျန်ရှိငွေများ ပေးအပ်ပြီးပါက ၎င်းတို့၏ ငွေပြားဟောင်းအတုများအား ဆိုင်ရှင်က ပြန်လည်ပေးအပ်မည်ဟု ညှိနှိုင်းသဘောတူညီမှု ရရှိခဲ့ကြောင်း သိရသည်။

သတင်း #အင်မိုင်ခ
ဓါတ်ပုံ #CNCMC