သီးနှံအခြေခံစားသောက်ကုန် ထုတ်လုပ်မှုနှင့် ရက်ကန်းသင်တန်းများကို ရှမ်းပြည်နယ်အတွင်း မြို့နယ်များ အလိုက် စဉ်ဆက် မပြတ် သင်တန်းများ ပို့ချသွားနိုင်ရန် စီစဉ်နေကြောင်း ရှမ်းပြည်နယ် (တောင်ပိုင်း) အသေးစား စက်မှုလက်မှုလုပ်ငန်း ဦးစီးဌာနမှ သိရသည်။

“အရင်နှစ်ကတော့ သင်တန်းတွေ မပေးနိုင်ဘူး။ ဒီနှစ်ကတော့ သင်တန်းတွေကို အဆက်မပြတ် ဖွင့်ပေး နေပါတယ်။ အခုလည်း ရပ်စောက်မှာက ဆိုင်ကယ်ပြင်သင်တန်း၊ ကလောမှာက အထည်ပန်းပုံရိပ်နဲ့ ဆေးရေးပန်းချီ သင်တန်းဆင်းပွဲ လုပ်နေပါတယ်။ ထပ်ပြီးလည်း ဌာနအနေနဲ့ သင်ကြားပေးသွားဦးမှာပါ” ဟု ရှမ်းပြည်နယ် အသေးစားစက်မှုလက်မှုလုပ်ငန်းဦးစီးဌာန ပြည်နယ်ဦးစီးမှူး ဦးသက်နိုင်ဦးက ပြောသည်။

ရှမ်းပြည်နယ်အတွင်း တောင်ကြီးမြို့နှင့် ကျောက်မဲမြို့တို့ရှိ ရက်ကန်းသင်တန်းကျောင်းများမှ ၂၀၁၅ -၂၀၁၆ ခုနှစ်အတွင်း သင်တန်း(၂၃) ကြိမ်၊၂၀၁၆-၂၀၁၇ ခုနှစ်အတွင်း (၃၅) ကြိမ် သင်တန်းပို့ချပြီးကြောင်း သိရသည်။

“ဒီနှစ်အတွင်းမှာ ဌာနကနေ ဖွင့်လှစ်ပေးခဲ့တဲ့ သင်တန်းတွေကို လက်တွေ့အသုံးချပြီး ပြန်ပြီး လုပ်ငန်းဆောင်ရွက်နေတဲ့ လုပ်ငန်းရှင်တွေကို ကွင်းဆင်းပြီး စာရင်းကောက်မယ်။ သူတို့ရဲ့ လုပ်ကိုင် ဆောင်ရွက်မှုနဲ့ လိုအပ်တာတွေ ကူညီဆောင်ရွက်ပေးမယ်။ အဲဒီအချိန်မှာပဲ တစ်ခါတည်း လုပ်ငန်းရဲ့ ဥပဒေ အကြောင်းအရာတွေကို စုစည်းပြီး ရှင်းလင်း ပြောကြားသွားမှာပါ။ ဒီနှစ်အတွင်း ရှင်းလင်း ဟောပြောတဲ့ အပိုင်းတွေ လုပ်သွားမှာပါ။ ဌာနက ပြည်နယ်အနေနဲ့ နှစ်နှစ်ပဲရှိသေးတယ်။ ဝန်ထမ်းကလည်း နည်းနေသေးတော့ အမှန်တကယ် ပြည်သူတွကြေားထဲကို ထဲထဲဝင်ဝင် လှုပ်ရှားမှု အားနည်းနေပါ သေးတယ်” ဟု ဦးသက်နိုင်ဦးက ပြောသည်။

အသေးစား စက်မှုလက်မှု လုပ်ငန်းဦးစီးဌာနက အခြေခံမော်တော်ယာဉ် ပြုပြင်ထိန်းသိမ်းနည်း သင်တန်း၊ ဝါးလက်မှုထည်၊ လူသုံးကုန်နှင့် အလှကုန်ထုတ်လုပ်မှု သင်တန်း၊ သစ်သီးဝလံ အခြေခံ စားသောက် ကုန်ထုတ်လုပ်မှု သင်တန်း၊ ပြည်တွင်းထွက် ဆန်ပဲပြောင်းဂျုံသီးနှံ အခြေခံတန်ဖိုးမြင့် စားသောက်ကုန်ထုတ် နည်းပညာ သင်တန်းများ၊ ရက်ကန်းကျောင်းတွင် လက်ရက်ကန်း သင်တန်း၊ ချည်မျှည်နှင့် အထည်အလိပ် ကျွမ်းကျင်သင်တန်း၊ သဘာဝဆိုးဆေးနည်းပညာ သင်တန်း၊ အထည်ပန်းပုံရိပ်နှင့် ဆေးရေးပန်းချီ သင်တန်း၊ ဂျပ်ခုတ်သင်တန်းနှင့် စက်ချုပ်သင်တန်းများကို မြို့နယ်အလိုက် ပို့ချသွားမည်ဖြစ်ကြောင်း သိရသည်။

သတင်း - နိုနို

⊰❂ #TachileikNewsAgency #TachileikOnlineNews www.tachileik.net  ❂⊱