~~~~~~~~⊰❂ unicode ❂⊱~~~~~~~~
ရှမ်းပြည်နယ်(တောင်ပိုင်း)၊ တောင်ကြီးမြို့မှ မေတ္တာရှင်ကုသိုလ်ဖြစ် ဆေးရုံတွင် ဖွင့်လှစ်ပြီး နှစ်လနီးပါး ကာလအတွင်း လူနာ(၂၁၈)ဦးအား မျက်စိခွဲစိတ် ကုသပေးခဲ့ပြီးကြောင်း မေတ္တာရှင်အသင်း (တောင်ကြီး)မှ သိရသည်။
အဆိုပါ ဆေးရုံအား ၂၀၁၇ခုနှစ် ဇန်နဝါရီလ (၁၂) ရက်နေ့က စတင်ဖွင့်လှစ်ကာ သောကြာနေ့မှ လွဲ၍ မျက်စိဝေဒနာရှင် များကို နေ့စဉ် အခမဲ့ ကုသပေးနခြေင်းဖြစ်ကြောင်း သိရသည်။
“တခြားကုသရေး အပိုင်းမှာတော့ ဘာမှ မလုပ်နိုင်သေးဘူး။ ဆေးရုံက ဆောက်တာ မကြာသေးဘူးဆိုတော့ လိုအပ်ချက်တွေလည်း အများကြီး ရှိပါတယ်။ ဝန်ထမ်းလည်း မလုံလောက်သေးဘူး။ ရေလည်း အပြည့်အဝ မရသေးဘူး။ အခုလောလောဆယ်က အလှူရှင်တွေရဲ့ ရေတွေနဲ့ပဲ အသုံးပြုနေရတယ်”ဟု မေတ္တာရှင်အသင်း (တောင်ကြီး)မှ အတွင်းရေးမှူး ဦးမော်တင်က ပြောသည်။
မေတ္တာရှင် ပရဟိတအသင်းသည် ၂၀၀၁ ခုနှစ် ဇန်နဝါရီလ (၁) ရက်နေ့တွင် စတင်ဖွဲ့စည်းခဲ့ပြီး အသင်း၏ မေတ္တာရှင်ကုသိုလ်ဖြစ်ဆေးရုံအား တောင်ကြီးမြို့၊ ကံသာရပ်ကွက်၊ မေတ္တာရှင်လမ်း၊ အကွက်အမှတ်(၃၀)၊ ဦးပိုင်အမှတ်(၄)တွင် ၂၀၁၇ ခုနှစ် ဇန်နဝါရီလ (၁၂) ရက်တွင် စတင်ဖွင့်လှစ်ကာ အထူးကု ဆရာဝန်ကြီးများ၊ ဆရာဝန်များက အခကြေးငွေမယူဘဲ စေတနာဖြင့်ကုသပေးနခြေင်းဖြစ်ကြောင်း သိရသည်။
“အများဆုံးက အသက် ၆၀ နဲ့ ၇၀ ကြားမှာများပါတယ်။ အမျိုးသမီးတွေပိုများပါတယ်။ အခုက ဝန်ထမ်းလည်း မလုံလောက်သေးတော့ ဒီလောက်ပဲ လုပ်နေရသေးတယ်။ ဝန်ထမ်းတွေကိုလည်း တချို့ခေါ်ထားပါတယ်။ ဦးတို့မှာကလည်း ငွေအတိုင်းအတာ မလုံလောက်သေးတဲ့ အတွက်ကြောင့် အကုန်လုံးတော့ မပြည့်စုံသေးပါဘူး။ ခွဲစိတ်ကုသမှု အပိုင်းမှာတော့ ပိတ်ရက်ကလွဲလို့ မျက်စိကုသတဲ့ သူတွေရှိရင် ဦးတို့ ဆေးရုံက ကုသမှုကို လုပ်ပေးပါတယ်။ ဆေးခန်းမှာ ပြည့်စုံဖို့အတွက် အလှူရှင်တွေလည်း ဖိတ်ခေါ်ပါတယ်”ဟု ဦးမော်တင်က ပြောသည်။
အဆိုပါ မေတ္တာရှင်ကုသိုလ်ဖြစ်ဆေးရုံတွင် ဝန်ထမ်းအင်အား (၃၁) ဦးသာ ရှိသောကြောင့် အခြား ကုသရေးအပိုင်း မပြုလုပ်နိင်သေးဘဲ မျက်စိခွဲစိတ်ကုသမှုကိုသာ ပြုလုပ်ပေးနိုင်သေးကြောင်း သိရသည်။
မေတ္တာရှင်ကုသိုလ်ဖြစ် ဆေးခန်း စတင်တည်ထောင်ခဲ့သည့် နေ့မှစ၍ ၂၀၁၆ ခုနှစ် ဒီဇင်ဘာလ (၃၁) ရက်နေ့ အထိ ကုသပေးခဲ့သော လူနာဦးရေ မှာ စုစုပေါင်း (၂၃၅,၁၂၂) ဦး ရှိပြီး ပညာသင်စရိတ် ထောက်ပံ့ပေးသော တက္ကသိုလ် ကျောင်းသား (၁၇)ဦးနှင့် သဘာဝဘေးအန္တရာယ် ကျရောက်သော ဒေသများ တွင်လည်း သွားရောက် ကူညီမှုများ လုပ်ဆောင်ခဲ့ကြောင်း သိရသည်။
သတင်း - နိုနို
