မန္တလေးတိုင်းဒေသကြီး ဝမ်းတွင်းမြို့ ပြည်သူ့ဆေးရုံအုပ်ကြီး၏ အိမ်တွင် ပုန်လျှိုးဝင်ရောက်နေသူက ဆရာဝန်၏ မိခင်အား ဓားဖြင့်ပက်သဖြင့် ရင်ညွန့်နှင့် မေးစေ့တို့တွင် ပြတ်ရှဒဏ်ရာများ ရရှိသွားကြောင်း သိရသည်။

" ဆေးရုံဝင်းဝန်ထမ်း အိမ်ယာဆိုတော့ ခြံခတ်ကာရံထားတာ မရှိဖူးပေါ့။ မီးဖိုနဲ့အိမ်သာကပ်လျှက်ရှိနေတာ။ ဆရာဝန်မကြီးအိမ်၊ မီးဖိုထဲရောက်နေသူက အိမ်သာကပြန်ထွက်တဲ့အဖွားနဲ့ ပက်ပင်းတိုးတော့ ကြောက်လန့်ပြီးဓားနဲ့ ပက်လိုက်တယ်ထင်တာပဲ”ဟု ဆယ်အိမ်မှူး ဦးတင်က ပြောသည်။

ဆေးရုံဝန်ထမ်းအိမ်ရာနေအိမ်၌ နိုဝင်ဘာလ (၉)ရက်နေ့ နံနက်(၂)နာရီတွင် ဆေးရုံအုပ်၏ မိခင်ဒေါ်ခင်ထွေးက အိမ်သာမှ အပြန်တွင် မီးဖိုခန်းတွင်း ရောက်နေသူက ဓားဖြင့်ပက်သဖြင့် ရင်ညွှန့်နှင့် မေးစေ့တို့တွင် ပြတ်ရှဒဏ်ရာများရရှိသွားခြင်းဖြစ်ကြောင်း သိရသည်။

“အိမ်သာရဲ့ အနောက်ဖက်မှာ ထမင်းစားထားတဲ့ ထမင်းဇလုံတခု တွေ့ရတယ်။ အဖွားက အသက်ကြီးပြီဆိုတော့ ဓားနဲ့ရန်လုပ်ထွက်ပြေးသူ လုံချည်အစိမ်းရောင်ဝတ်ထားပြီး ပိန်ပါးပါး၊ အရပ်မနိမ့်မမြင့်လောက်ပဲ ပြောနိုင်တယ်။ အဖွားလည်ပင်းကဆွဲထားတဲ့ ချည်ကြိုးတွဲထားတဲ့ ပယင်းဆွဲသီးလေးပြတ်သွားတယ်။ ယူမသွားပါဘူး။ အခြားပစ္စည်းတစုံတခုမှ မပျောက်ဘူး။ မီးဖိုချောင်သုံးဓားတစ်ချောင်းတော့ လျော့နေတယ်။ အဲဒီဓားနဲ့ပဲ အဖွားကိုပက်ခဲ့တယ်ထင်တယ်”ဟု ဒုရဲအုပ်သိန်းဇော်သန်းက Tachileik News Agency သို့ ပြောသည်။

ဒေါ်ခင်ထွေး၏ တိုင်တန်းချက်အရ ဝမ်းတွင်းမြို့မရဲစခန်းတွင် အမှုအမှတ်(ပ)၂၁၀/၂၀၁၆ဖြင့် ညအချိန်အိမ်အတွင်း ပုန်လျှိုးဝင်ရောက်သောပြစ်မှုပုဒ်မ ၄၅၆ နှင့် ချွန်ထက်သောလက်နက်ဖြင့် သာမန်ဒဏ်ရာရရှိစေသော ပြစ်မှု ပုဒ်မ ၃၂၄ တို့ဖြင့် အမှုဖွင့်ဆောင်ရွက်နေကြောင်း သိရသည်။

သတင်း - ကိုလင်း