တောင်ကြီးမြို့တွင် နှစ်စဉ်ကျင်းပနေသည့် တန်ဆောင်တိုင် မီးပုံးပျံပွဲတော်တွင် ကုန်ကျစရိတ် မြင့်လာသော်လည်း ကုမ္ပဏီများကပါ ဝင်ရောက်ယှဉ်ပြိုင်လာမှုကြောင့် ၀င်ရောက်ယှဉ်ပြိုင်သူ အရေအတွက် နှစ်စဉ်ထက်တိုးလာကြောင်း ဒေသခံ မီးပုံးပျံလုပ်ကိုင် သူများထံမှ သိရသည်။

“တစ်နှစ်ထက်တစ်နှစ် မီးပုံးပျံပြိုင်ပွဲဝင်တဲ့ မီးပုံးအရေအတွက်က တိုးလာတယ်။ ဒီနှစ်တော့ အခုမှစာရင်းစ ကောက်တုန်းဆိုတော့ အရေအတွက်က အတိအကျ မသိရသေးဘူး။ ကုမ္ပဏီတွေကလည်း သူတို့ကုန် ပစ္စည်း ကြေညာဖို့ စပွန်ဆာပေးပြီးလုပ်ခိုင်းတာလည်း ရှိ်တယ်။ ကျွန်တော်တို့ မိသားစုဆိုရင် တစ်နှစ်ကို မီးပုံးပျံ (၈)လုံးကနေ (၁၀)လုံးအထိလုပ်တယ်။ တစ်လုံးကို ကျပ်နှစ်သိန်းလောက်တော့ ကျန်တယ်။” ဟု ဆယ်နှစ်ကျော်မီးပုံးပျံ လုပ်ငန်းလုပ်ကိုင်သူတစ်ဦး ဖြစ်သည့် ဦးနီက ပြောသည်။

ယခုနှစ် မီးပုံးပျံပွဲတော်အတွက် အောက်တိုဘာလ (၁၇) ရက်နေ့က  ရရှိထားသောစာရင်းအရ ညမီးကြီး အလုံးရေ (၇၃) လုံး၊ စိန်နားပန် အလုံးရေ (၃၁) လုံး၊ နေ့လွှတ်အရုပ်များ ဖြစ်သည့် ခြေနှစ်ချောင်း အလုံးရေ (၈၉) လုံး၊ ခြေလေးချောင်း အလုံးရေ (၅၈) လုံး၊အုပ်စုဖွဲ့အရုပ် အလုံးရေ (၄၃) လုံး စုစုပေါင်း (၂၉၄) လုံး ရှိပြီ ဖြစ်ကြောင်း သိရှိရသည်။

“မီးပုံးပျံပြိုင်ပွဲက ဒေသခံတွေအတွက် အရမ်းတန်ဖိုးထားရတဲ့ ပွဲတော်တစ်ခုပါ။ ဆုရတာ/မရတာကို သိပ်အရေး ဂရုမစိုက်ကြသလို ဒီအချိန်ရောက်ရင် လူကြီး/လူငယ်တွေ အနေနဲ့ မီးပုံးလုပ်ရတာကို ၀ါသနာတစ်ခုလို စွဲနေကြတာပါ။ အရင်းအနှီးလည်း များသလို ပြန်ရတယ်ဆိုတာလည်း မရှိပေမဲ့ အရှုံးခံပြီးလုပ်နေကြတာ” ဟု နှစ်စဉ် မီးပုံးပျံ လုပ်ကိုင်နေသူ ကိုဇော်မြင့်က ပြောသည်။

၂၀၁၅ ခုနှစ် တန်ဆောင်တိုင်မီးပုံးပွဲတော်အတွင်းသို့ ၀င်ရောက်ယှဉ်ပြိုင်ခဲ့သည့် မီးပုံးပျံအရေအတွက်မှာ ညမီးကြီးမီးပုံး အလုံးရေ(၁၀၀)၊ စိန်နားပန်မီးပုံး အလုံးရေ(၈၀) နှင့်နေ့လွှတ်အရုပ်မီးပုံးအရေအတွက်မှာ (၆၀၀)၀န်းကျင်အထိရှိကြောင်းသိရပြီး ရှမ်းပြည်နယ်မီးပုံးပျံဖြစ်မြောက်ရေးကော်မတီမှ တာဝန်ယူကျင်းပပေးခြင်းဖြစ်ကာ အကဲဖြတ်ဒိုင်(၉၀)၀န်းကျင်ဖြင့် အမှတ်ပေးဆုံးဖြတ်ခြင်းဖြစ်ကြောင်း သိရသည်။

ကုန်ကျစရိတ်အနေဖြင့် စိန်နားပန်မီးပုံးတစ်လုံးလျှင် ကျပ် (၁၅)သိန်းဝန်းကျင်၊ ညမီးကြီးမီးပုံးတစ်လုံးလျှင် ကျပ်သိန်း (၄၀) ၀န်းကျင်နှင့်နေ့လွှတ်အရုပ် မီးပုံးတစ်လုံးလျှင် ကျပ် (၅)သိန်းဝန်းကျင် ကုန်ကျကြောင်းနှင့် ဆုပေးနှုန်းများမှာ စိန်နားပန် မီးပုံးဆုကြေးမှာ ကျပ်သိန်း(၂၀)၊ ညမီးကြီးမီးပုံးဆုကြေးမှာ (၆၅)သိန်းနှင့် နေ့လွှတ်အရုပ်မီးပုံးဆုကြေးမှာ အရုပ်ပေါ်မှုတည်ပြီး ကျပ် ၃ သိန်းမှ ၇ သိန်းအထိ သတ်မှတ်ထားကြောင်း သိရသည်။

“အရင်နှစ်က ဒီအချိန်ဆိုရင် စာရင်းအရ မီးပုံးအလုံးရေ (၈၀) လောက်ပဲ ရှိသေးတယ်။ အခုက (၁၀၀) ကျော်နေပြီ။ အများစုကတော့ နေ့ခင်းလွှတ်တဲ့ အလှပြအရုပ်ကိုလွှတ်ကြတယ်။ သူကကုန်ကျစရိတ်လည်း သိပ်မများဘူး။ ၀ါသနာအရ လွှတ်ချင်တဲ့သူတွေလည်း အဆင်ပြေတယ်။ အလှရုပ်လွှတ်တဲ့သူတွေလည်း နှစ်တိုင်းများလာတယ်။”ဟု မီးပုံးပျံ စာရင်းလက်ခံဌာနမှ တာဝန်ရှိသူတစ်ဦးက ပြောသည်။

တောင်ကြီးတန်ဆောင်တိုင်မီးပုံးပျံပွဲတော်အတွင်း  မီးပုံးပျံပြိုင်ပွဲတွင် ၀င်ရောက်ယှဉ်ပြိုင်သည့် မီးပုံးပျံ အမျိုးအစားများမှာ မီးပုံးလေးများဖြင့် အလှဆင်သည့် စိန်နားပန်မီးပုံး၊ ယမ်းအလှများဖြင့် ယှဉ်ပြိုင်ရသည့် ညမီးကြီးမီးပုံးနှင့် နေ့ခင်းတွင်လွှတ်တင်ရသည့် နေ့လွှတ်အရုပ်မီးပုံးဟူ၍ သုံးမျိုးရှိကာ ညမီးကြီးမီးပုံးမှာ ကုန်ကျစရိတ် အများဆုံးနှင့်လုပ်ကိုင်ချိန်ကြာမြင့်ဆုံးဖြစ်ကြောင်း သိရသည်။

~~~~~~~~⊰❂ unicode ❂⊱~~~~~~~~

⊰❂ #TachileikNewsAgency #TachileikOnlineNews www.tachileik.net  ❂⊱

~~~~~~ ကြော်ငြာ ~~~~~~