~~~~~~~~⊰❂ unicode ❂⊱~~~~~~~~

ထိုင်းနိုင်ငံ ပထုံဌာနီ(Pathum Thani)ခရိုင်၊ ခရောင်းဖအူးဒုန်းရပ်ကွက်၊ လပ်လွန်ကျောက်အုပ်စုတွင် နာမည်ကြီးအမှတ်တံဆိပ်များကို အသုံးပြုထားပြီး ကော်ဖီများကို အမှတ်တံဆိပ်အတုများဖြင့် ထုတ်လုပ်နေသည့် စက်ရုံအား ထိုင်းရဲတပ်ဖွဲ့မှ ပူးပေါင်းအဖွဲ့ဖြင့် အောက်တိုဘာလ(၆)ရက်နေ့က ဝင်ရောက်နှိမ်နင်းလိုက်ကြောင်း ထိုင်းနိုင်ငံမီဒီယာများတွင် ဖော်ပြထားချက်အရ သိရသည်။

"တရုတ်နိုင်ငံပဲ အတုထုတ်လုပ်တယ်လို့ ထင်ရပေမယ့်၊ အခုတော့ ကျွန်တော်တို့ ထိုင်းနိုင်ငံမှာလည်း ထိုင်းပြည်သူ အချင်းချင်း အတုထုတ်ပြီး ရောင်းချနကြေတယ်။ ကော်ဖီကြိုက်နှစ်သက်သူများ သတိထားကြပါ"ဟု ဖမ်းဆီးရေး ပူးပေါင်းအဖွဲ့တွင် ပါဝင်တစ်ဦးက ဆိုသည်။

ဖမ်းဆီးသိမ်းဆည်းရမိသည့် ပစ္စည်းများမှာ ကော်ဖီထုတ်လုပ်စက်(၄)လုံး၊ ကော်ဖီပေါင်းစပ်စက်(၄)လုံး၊ ထုတ်လုပ်ပြီးသော ကော်ဖီအထုပ် ပေါင်း(၂၄၅)ထုပ်၊ ပေါင်းစပ်ပြီးသော ကော်ဖီ(၁၉)အိတ်၊ Creamer (၁၀၂)အိတ်၊ ကော်ဖီထည့်သည့်ဘူးပေါင်း (၄၈၀)ဘူး၊သကြား(၅)အိတ်၊ အိုဗာတင်း တံဆိပ်ပါအိတ်(၄၃၉,၂၀၀)အိတ်၊ ကော်ဖီ တံဆိပ်ပါအိတ် (၂၈၈,ဝဝဝ)အိတ်၊ ပေါင်းစပ်ပြီးဖာ(၇)ဖာ (၁)ဖာလျှင်(၄,ဝဝဝ)ထုပ် စုစုပေါင်း(၂၈,ဝဝဝ)ထုပ် နှင့် ဖျော်စက်(၁)လုံး ပါဝင်ကြောင်းနှင့် ယခု ဖမ်းဆီးရမိသော ပစ္စည်းများသည် တစ်ရက်အတွင်း ထုတ်လုပ်ပြီးသော အရေအတွက်များ ဖြစ်ကြောင်း သိရသည်။

အဆိုပါဂိုဒေါင်အတွင်း ဝင်ရောက်ဖမ်းဆီးရာတွင် ရွှေ့ပြောင်းလုပ်သား(၇)ဦးပါဝင်ကြောင်းတွေရှိရပြီး၊ (၅)ဦးမှာ တရားမဝင်အလုပ်သမားများဖြစ်နေကြောင်း သိရသည်။

ဘာသာပြန် - #နန်းမောက်ကွမ်
Ref; posttoday, ch7
Photo: posttoday , Sumit Athiprom