တောင်ကြီးမြို့ မီးပုံးပျံပွဲတော်ကာလ အတွင်း Drone Camera ဖြင့် ရိုက်ကူးရေး ပြုလုပ်လိုသူများအနေဖြင့် ကင်မရာနှင့် ရိုက်ကူးသူများကို ပွဲကျင်းပရေးကော်မတီထံ ပွဲမကျင်းပမီ သုံးရက်အလိုတွင် မှတ်ပုံတင်ရမည် ဖြစ်ကြောင်း ရှမ်းပြည်နယ်ရဲတပ်ဖွဲ့မှူးရုံးမှ သိရသည်။

“ခေတ်က တိုးတက်လာတော့ ဒီ Drone နဲ့ရိုက်ကူးရေးလုပ်မယ့် သူတွေကိုလည်း ပြည်နယ်အစိုးရက ခွင့်ပြုတယ်။ ဒါပေမဲ့ မီးပုံပျံတွေ ထိခိုက်မှာစိုးတဲ့ အတွက် ချမှတ်ထားတဲ့ စည်းကမ်းအတိုင်း ဆောင်ရွက်ရမှာ ဖြစ်ပါတယ်။ နောက်ပြီး Drone အမျိုးအစားကို သတ်မှတ်ထားပါတယ်။ ဒါပေမဲ့ အရေအတွက်တော့ ကန့်သတ် မထားပါဘူး။”ဟု ရှမ်းပြည်နယ် ရဲတပ်ဖွဲ့ ဦးစီးဌာန၊ ဒု-ရဲမှူးကြီး ဦးစိုင်းလွင်က Tachileik News Agencyသို့ ပြောသည်။

အလိုအလျောက် ထိန်းချုပ်ရေးစနစ်ပါသော Phantom 4 Drone အမျိုးအစားကိုသာ သတ်မှတ်နေရာမှ လွှတ်တင်ခွင့်ပြုမည်ဖြစ်ပြီး ကွပ်ကဲမှုအဖွဲ့က စစ်ဆေးမှုကို ခံယူရမည်ဖြစ်ကြောင်း သိရသည်။

“ခေတ်အရ Drone နဲ့ရိုက်ကူးတဲ့သူတွေကများလာတယ်။ အရင်နှစ်တွေကတော့ ပွဲမှာ Drone နဲ့ ရိုက်ကူးရေးလုပ်တဲ့သူ မရှိသလောက်ရှားတယ်။ လူငယ် အများစုကလည်း ဒီလိုပွဲမျိူးမှာ လက်စွမ်း ပြကြလိမ့်မယ်လို့ ထင်တယ်။ ဒီလိုစည်းကမ်းလေး လုပ်လိုက်တော့ မဖြစ်ခင်က ကြိုတင် ကာကွယ်ပြီးသားဖြစ်တာပေါ့။” ဟု မီးပုံးပျံပြုလုပ်သူတစ်ဦးက ပြောသည်။

Drone ပျံသန်းမှုကြောင့် ပျက်စီးဆုံးရှုံးခြင်းများ ဖြစ်ပေါ်လာပါက ဆုံးရှုံးမှုအားလုံး၏ ကာလတန်ဖိုး(၃)ဆ ပေးလျော်ရမည် ဖြစ်ပြီး မှတ်ပုံတင်မထားသော Drone လွှတ်တင်ခြင်းကို စစ်ဆေးတွေ့ရှိပါက ဥပဒေနှင့်အညီ အရေးယူ ဆောင်ရွက် သွားမည်ဖြစ်ကြောင်း ပြည်နယ်ရဲတပ်ဖွဲ့မှူးရုံးမှ ဒု-ရဲမှူးကြီး စိုင်းလွင် ထံမှ သိရသည်။

Drone Camera ဖြင့် ရိုက်ကူးရေး လုပ်လိုသူများ အနေဖြင့် မီးပုံးပျံလွှတ်တင်မည့် ဧရိယာ အပြင်ဘက် မီတာ(၁၀၀) အကွာမှ လွှတ်တင်ရမည်ဖြစ်ပြီး မီးပုံးပျံနှင့်နီးကပ်စွာ ပျံသန်းခြင်းကို မပြုလုပ်ရန်လည်း တားမြစ်ထားကြောင်း သိရသည်။

တောင်ကြီးတန်ဆောင်တိုင် မီးပုံပျံပွဲတော်အား ၂၀၁၆ခုနှစ် နိုဝင်ဘာလ(၆)ရက်နေ့မှ နိုဝင်ဘာလ(၁၅)ရက်နေ့အထိ ကျင်းပပြုလုပ်မှာဖြစ်ပြီး ပြိုင်ပွဲဝင် မီးပုံးပျံများမှ ယခင်နှစ်ထက် များပြားကြောင်း သိရှိရသည်။

သတင်း - ရွှေဇော် ၊ နိုနို

~~~~~~~~⊰❂ unicode ❂⊱~~~~~~~~

⊰❂ #TachileikNewsAgency #TachileikOnlineNews www.tachileik.net  ❂⊱

~~~~~~ ကြော်ငြာ ~~~~~~