ကယားပြည်နယ်၊ လွိုင်ကော်မြို့ရှိ ကားဂိတ်ဟောင်းတွင် မီးလောင်မှုတစ်ခု သြဂုတ်လ(၃၁)ရက်နေ့ နံနက်(၂း၄၀)နာရီဝန်းကျင်က ဖြစ်ပွားရာ ဆိုင်ခန်းပေါင်း (၁၇)ခန်း မီးလောင်ကျွမ်းသွားကြောင်း သိရသည်။

လွိုင်ကော်မြို့နယ်၊ လောဓမ္မရပ်ကွက်ရှိ သီရိမင်္ဂလာဈေးအနီးရှိ ကားဂိတ်ဟောင်းတွင် မီးလောင်မှု ဖြစ်ပွားခြင်းဖြစ်ပြီး မီးလောင်ကျွမ်းမှုနှင့် ပတ်သက်၍ အဆိုပါ ကားဂိတ်ဆိုင်ခန်းရှိ မျက်နှာကျက်တွင် တပ်ဆင်ထားသည့် ဝါယာကြိုးမှာ အပူလွန်ကဲပြီး မျက်နှာကျက်မှ တဆင့်ကူးစက်ကာ လောင်ကျွမ်းသွားခြင်း ဖြစ်ကြောင်း သိရသည်။

"စလောင်တာက ရွှေကန္ဒါအောင် ကားဂိတ်ကနေလောင်တာ စတွေ့တယ်၊ ပြီးတော့ကူးသွားတာပေါ့ ပစ္စည်းတွေလည်း ဆွဲလို့မနိုင်တော့ဘူး အကုန်လောင်သွားတာ" ဟု သီရိမင်္ဂလာ ဈေးစောင့် တစ်ဦးက ပြောသည်။

မီးအရှိန်ပြင်းသောကြောင့် လွိုင်ကော်မြို့နယ်ရှိ မီးသတ်ယဉ်များအပြင် ဒီးမော့ဆိုမြို့မှ မီးသတ်ယဉ်များ အပါအဝင် စုစုပေါင်း (၁၃)စီး ဖြင့် လာရောက်ငြိမ်းသတ်ခဲ့ရပြီး နံနက် လေးနာရီခန့်တွင် မီးညွှန့်ကျိုးသွားကာ ဆိုင်ခန်းပေါင်း (၁၇) ခန်းတွင် ဆေးဆိုင်၊ မိုဘိုင်းဖုန်းဆိုင်များ၊ စက်ဘီအရောင်းဆိုင်များ၊ ကုန်စုံဆိုင်များ၊ ဆန်ဆိုင်များ နှင့် ကားဂိတ်(၄)ဂိတ်ပါ လောင်ကျွမ်းသွားခဲ့ကြောင်းနှင့် မီးစတင်လောင်ကျွမ်းခဲ့သည့် တိုက်ခန်းပိုင်ရှင် ဦးစောချယ်ရီဘက်အား လွိုင်ကော်မြို့မရဲစခန်းတွင် အမှုဖွင့်အရေးယူ ဆောင်ရွက်ထားရှိကြောင်း သိရှိရသည်။

သတင်း/ဓာတ်ပုံ - ဆန်းဖြိုးထွန်း