တာချီလိတ်၊ ဇွန်လ (၁) ရက်
ရှမ်းပြည်နယ်အရှေ့ပိုင်း တာချီလိတ်မြို့မှ ရှမ်းတိုင်းရင်းသားအများစုသည် ဒေသတွင်းထက် ဈေးနှုန်း သက်သာသည့် ထိုင်းနိုင်ငံ မယ်ဆိုင်မြို့တွင် အိမ်ခြံမြေများဝယ်ယူကာ သွားရောက်နေထိုင်သူ များလာကြောင်း အိမ်ခြံမြေအရောင်းဝယ်လုပ်ကိုင်သူများထံမှ သိရသည်။

“အဓိက ဟိုဘက်ကို သွားနေထိုင်ကြတာက ပထမအချက်အနေနဲ့ သူတို့ဖက်မှာ မြေကွက်တစ်ကွက် အနည်းဆုံး (၆၀-၈၀) အကွက်ကြီးရိုက်တယ်။ တခါတလေ ပေ (၁၀၀)ပတ်လည်အထိရိုက်တယ်။ ဒုတိယအချက်က ဈေးနှုန်းက ခေါက်ချိုးလောက်ကွာတယ်။ ဒါတောင် တချို့ အိမ်တစ်ထပ်တိုက်လည်း ပါတယ်။ နောက်တစ်ချက်က အဆောက်အဦးက ခိုင်ခံသပ်ရပ်တယ်။ ဝယ်မယ်ဆိုရင် အရစ်ကျစနစ်နဲ့လည်း ပေးတယ်။ အဲဒီအချက်သုံးချက်ကြောင့် ဟိုဘက်မှာ သွားနေထိုင်ကြတယ်။”ဟု တာချီလိတ်မှ အိမ်ခြံမြေရောင်းဝယ် လုပ်ကိုင်သူ ကိုဆန်းဝင်းက ပြောသည်။

တာချီလိတ်မြို့၏ မြေကွက်ပေါက်ဈေးနှုန်းများမှာ ပေ(၄၀- ၆၀) တစ်ကွက်လျှင် ဘတ်(၂၅)သိန်းဝန်းကျင်မှ နေရာအလိုက် ဈေးနှုန်းကွာဟမှုရှိပြီး ထိုင်းနို်င်ငံ မယ်ဆိုင်မြို့တွင် ပေ(၄၀-၆၀)တစ်ကွက် အိမ်တစ်ထပ်တိုက် အပါအဝင် ဘတ်(၂၀)သိန်းဝန်းကျင်သာရှိကြောင်းနှင့် လုံးချင်းအိမ်အသေး ဘတ်(၂)သိန်းရှိကြောင်း သိရသည်။

“ဟိုဘက်မှာက ဈေးသက်သာလို့ သွားဝယ်ပြီးနကြေတာ။ (၄၀ - ၆၀)တစ်ကွက်ကို တစ်ထပ်တိုက်အိမ်အပါ သိန်း(၂၀)ဘတ်ကျော်ပဲ ရှိတယ်။ အများအားဖြင့်ကတော့ အဲဒီဖက်မှာ ဝယ်မယ်ဆိုရင် စာရွက်စာတမ်း အပြည့်စုံပါတာပဲ ဝယ်ကြပါတယ်။ အဲဒီဖက်မှာ အများဆုံး အိမ်ခြံမြေဝယ်တာကတော့ ရှမ်းတိုင်းရင်သားတွေက ပိုများပါတယ်။”ဟု တာချီလိတ်မှ မနန်းနွံက ပြောသည်။

တာချီလိတ်မြို့နှင့် အနီးဆုံးနယ်စပ်မြို့ဖြစ်သည့် မယ်ဆိုင်မြို့အပြင် ချင်းရိုင်း၊ ချင်းမိုင်ဒေသများတွင်ပါ အိမ်ခြံမြေဝယ်ယူနေထိုင်ကြသည့် ရှမ်းတိုင်းရင်းသားများရှိကြောင်း အိမ်ခြံမြေရောင်းဝယ်သူများထံမှ သိရသည်။

သတင်း။ ဇောင်းညီ