တာချီလိတ်၊ မေလ(၂၃)

တာချီလိတ်မြို့နယ်အတွင်း ၂၀၁၅ -၂၀၁၆ ခုနှစ် ပညာသင်နှစ်၏ ဘက်စုံထူးချွန်ဆုရ ကျောင်းသူ?ကျောင်းသား(၆)ဦးအား တစ်ဦးလျှင် ကျပ်(၄)သိန်းကျော်တန်ဖိုးရှိ ရွှေ(၅)မူးသားဆီပါဝင်သည့် လက်စွပ် (၆)ကွင်းအား မေလ(၂၂)ရက်နေ့၊ ည(၇)နာရီအချိန်က ဂုဏ်ပြုညစာ စားပွဲတွင် ချီးမြှင့်ခဲ့ကြောင်း သိရသည်။

"အဓိက ဂုဏ်ပြုသင့်တဲ့ကလေးတွေကို ဂုဏ်ပြုတာမှ ဒါမှ ကလေးတွေ အနာဂါတ်မှာ ပိုပြီး ကြိုးစားလာကြမယ် ဒါမျိုးဂုဏ်ပြုတာ ဒုတိယအကြိမ်မြောက်ပါ၊ နယ်စပ်ဒေသမှာနေတဲ့ ကလေးအများစုက ပြည်မကြီးက ကလေးတွေထက် စာရင် ပညာရေး အခွင့်အရေးနည်းပါ ပါတယ်၊ ဒါမျိုးတွေ များများဂုဏ်ပြုလာမယ်ဆိုရင် ကျောင်းတွေရော ကလေးတွေအတွက်ပါ ပိုကောင်းမယ်လို့ ယုံကြည်လို့ ဆုပေးတာပါ၊ ၂၀၁၃ခုနှစ်တုန်းကလည်း အခုလိုပဲ ချီးမြှင့်ခဲ့ပါတယ်။ ဒါနဲ့ဆို ဒုတိယအကြိမ်လို့ ပြောလို့ရပါတယ်၊ ၂၀၁၄ နဲ့ ၂၀၁၅ မှာတော့ သက်ဆိုင်ရာ ပညာရေးဌာနက ဆက်သွယ်ခြင်း မရှိတဲ့အတွက်ကြောင့် နှစ်နှစ်ဆက်တိုက် ရွှေသားချီးမြှင့်ခြင်း မပြုလုပ်နိုင်ခဲ့ပါဘူး"ဟု ရွှေလက်စွပ်ချီးမြှင့်ပေးခဲ့သော ရှမ်းပြည်နယ်အရှေ့ပိုင်းသတင်းစာဆရာအသင်း ဥက္ကဌ ဦးအောင်ဖြိုးရှိန်က ပြောသည်။

တာချီလိတ်မြို့နယ်၏ ၂၀၁၆ ခုနှစ် ဘက်စုံထူးချွန်ဆုရ ကျောင်းသား၊ ကျောင်းသူများနှင့် ကျောင်းအုပ်ကြီးများ၊ မြို့နယ်အဆင့် စတုတ္ထတန်း နှင့် အဌမတန်းအောင်ချက် အကောင်းဆုံးဆုရရှိသော ကျောင်းအုပ်ကြီးများအား ဂုဏ်ပြုညစာ စားပွဲ ကျင်းပပြုလုပ်ပြီး ဘက်စုံထူးချွန်ဆုရ လူရည်ချွန် ကျောင်းသား၊ ကျောင်းသူ (၆)ဦးအတွက် ရွှေလက်စွပ်တစ်ကွင်းစီဖြင့် စုစုပေါင်း (၆)ကွင်း ကို စေတနာရှင်အလှူရှင် (၆)ဦးတို့မှ အသီးသီးပေးအပ်ချီးမြှင့်လိုက်ကြောင်း သိရသည်။

ရွှေလက်စွပ်ချီးမြှင့်သူများမှာ တာချီလိတ်ခရိုင်အုပ်ချုပ်ရေးမှူး ဦးတင်ဝင်းရွှေ၊ မြို့နယ်အုပ်ချုပ်ရေးမှူး ဦးထွန်းဝင်းအောင်၊ မြို့နယ်အထောက်အကူပြုကော်မတီ ဥက္ကဌ ဦးကြည်မြင့်၊ မြို့နယ်ရဲတပ်ဖွဲ့မှူး ရဲမှူးသိန်းထွန်းဦး၊ ရှမ်းပြည်နယ်အရှေ့ပိုင်းသတင်းစာဆရာများအသင်းဥက္ကဌ ဦးအောင်ဖြိုးရှိန် နှင့် မဇ္ဈိမလူမှုကူညီရေးအသင်းဥက္ကဌ ဦးတင့်ဆွေ တို့မှ ချီးမြှင့်ခဲ့ခြင်းဖြစ်ပြီး၊ ရွှေလက်စွပ်တစ်ကွင်းလျှင် တန်ဖိုးငွေ ဘတ်(၁၂,၂၀၀)တန်ဖိုးရှိကြောင်း နှင့် ယခုကဲ့သို့ ချီးမြှင့်ခဲ့သည်မှာ (၂)ကြိမ်မြောက်ခဲ့ပြီ ဖြစ်ကြောင်း၎င်းထံမှ သိရသည်။

တာချီလိတ်မြို့နယ်အတွင်း ဘက်စုံထူးချွန်ဆုရရှိသော ကျောင်းပေါင်း(၅)ကျောင်းပါဝင်ပြီး၊ ဆုရရှိသော ကျောင်းသားများမှာ (၆)ဦးရှိကြောင်းနှင့် မြို့နယ်အတွင်း အစိုးရစစ်ဖြစ်သည့် စတုတ္ထတန်းနှင့် အဌမတန်းအား ရာနှုန်းပြည့်အောင်မြင်သော ကျောင်းအုပ်ကြီးများအား ဆုချီးမြှင့်ပေးခဲ့ကြောင်း သိရသည်။

အဆိုပါ ညစာ စားပွဲနှင့် ဆုချီးမြှင့်ခြင်း အခမ်းအနားသို့ စစ်ဗျူဟာအဖွဲ့(အခြေချ) တချီလိတ်၊ စစ်ဗျူဟာမှူး ဗိုလ်မှူးကြီး ကျော်ကိုထိုက် နှင့် တာချီလိတ်မြို့နယ်အုပ်ချုပ်ရေးမှူး ဦးထွန်းဝင်းအောင်နှင့် ပညာရေးမှ ဆရာ/မများ၊ ကျောင်းသား၊ ကျောင်းသူများ နှင့် ဖိတ်ကြားထားသည့် ဧည့်သည်များ တက်ရောက်ခဲ့ကြသည်။

သတင်း။ ကိုဇက်

ဓာတ်ပုံ။ ဇောင်းညီ

⊰❂ #TachileikNewsAgency #TachileikOnlineNews www.tachileik.net  ❂⊱