တာချီလိတ်၊ မေလ(၂၃)ရက်
ရှမ်းပြည်နယ်(အရှေ့ပိုင်း) မြန်မာ - ထိုင်း နယ်စပ် တာချီလိတ်မြို့၌ ဒေသတွင်း ပြေးဆွဲနေသည့် သုံးဘီးဆိုင်ကယ်များသည် ခရီးသည်ပို့ဆောင်ရေးထက် ထိုင်းနိုင်ငံမှ တစ်ပိုင်တစ်နိုင် ကုန်စည်သယ်ဆောင်ရေးကို အားထားလာနေရကြောင်း သိရသည်။

"အရင်တုန်းကတော့ ခရီးသွားများလို့ အလုပ်အကိုင် အဆင်ပြေပါတယ်။ နောက်ပိုင်းတော့ ထိုင်းနိုင်ငံထုတ် ပစ္စည်းတွေကို ဒေသတွင်း ပြန်လည်ရောင်းချဖို့ သယ်ဆောင်တဲ့နေရာမှာ အသုံးပြုတာ ပိုများလာတယ်။ မယ်ဆိုင်က ကုန်တွေဆိုရင်အစုံပဲ။ ဟင်းသီးဟင်းရွက်ကနေ စားသောက်ကုန် အစုံသယ်တာ။ မြန်မာဘက်ကဆို ဒေသထွက်ကုန်ဖြစ်တဲ့ ရာသီ သီးနှံတွေ ပို့တာပေါ့"ဟု သုံးဘီးဆိုင်ကယ်မောင်းနှင်သူ ကိုမျိုးမင်းဦးက ပြောသည်။

နယ်စပ်မြို့ဖြစ်သည့် တာချီလိတ်တွင် ဒေသတွင်း ပြန်လည်ရောင်းချရန် ထိုင်းနိုင်ငံမှ ကုန်ပစ္စည်းများကို တစ်ပိုင်တစ်နိုင်သယ်ယူခွင့်အား ရှမ်းပြည်နယ်အစိုးရမှ အခွန်ငွေ(၃) ရာခိုင်နှုန်းသာကောက်ခံပြီး သယ်ဆောင်ခွင့်ပြုထားခြင်းဖြစ်သည်။

ကုန်ပစ္စည်းသယ်သည့် သုံးဘီးဆိုင်ကယ်များအား ထိုင်းနိုင်ငံမှ အခွန်ငွေကောက်ခံကြောင်း သိရသည်။
"မယ်ဆိုင်ကကုန်တွေ သယ်လာရင် ပစ္စည်းအနည်းအများပေါ်မူတည်ပြီး ရှမ်းပြည်နယ်အစိုးရက အခွန်ငွေ(၃) ရာခိုင်နှုန်းဆိုပြီး ကောက်တယ်။ ပစ္စည်းနည်းရင် ဘတ်(၁၀၀)၊ များရင်တော့ ဘတ်(၂၀၀)ပေါ့။ အဓိကသယ်တာလည်း ဟင်းသီးဟင်းရွက်နဲ့ အသား၊ ငါးတွေနဲ့ တခြားစားသောက်ကုန်တွေ သယ်တာများပါတယ်။ တချို့ကလည်း သစ်သီးသယ်ကြတယ် "ဟု သုံးဘီးမောင်းနှင်သူ ကိုထွန်းထွန်းက ပြောသည်။

သုံးဘီးဆိုင်ကယ်ဖြင့် ကုန်ပစ္စည်းများသယ်ဆောင်ရာတွင် ကန့်သတ်ကုန်ပစ္စည်းမှလွဲ၍ ကျန်ကုန်စည်များအား သယ်ယူခွင့်ပြုထားကြောင်း သိရသည်။

ထိုင်းနိုင်ငံသို့ ကြက်သွန်နီ၊ ကြက်သွန်ဖြူ၊ ထောပတ်သီးကဲ့သို့ သီးနှံများတင်ပို့ရပြီး ထိုင်းနိုင်ငံမှ လူသုံးကုန်နှင့် စားသောက်ကုန်အမျိုးမျိုးအား ပြန်လည်သယ်ဆောင်လာလေ့ရှိကြောင်း သယ်ယူပို့ဆောင်ခမှာ ကုန်ပစ္စည်းပေါ်မူတည်၍ ဘတ်(၃၀၀)မှ ဘတ်(၁၀၀၀)ထိ အမြတ်ငွေကျန်လေ့ရှိကြောင်း သုံးဘီးမောင်းနှင်သူများထံမှ သိရသည်။

သတင်း။ ကိုဇက်