( unicode )

စစ်တွေ၊ မတ်လ (၁၀) ရက်။ ရန်ကုန်မြို့ တော်ဝင်နှင်းဆီခန်းမတွင် မတ်လ (၆)ရက်နေ့က ပြုလုပ်ခဲ့သည့် ရခိုင်ဒီမိုကရေစီအဖွဲ့ချူပ် (ALD)၏ အဖွဲ့ဝင် (၆) ဦးကို ပါတီ၏ စည်းကမ်းဥပဒေ ဖောက်ဖျက်မှုနှင့် အရေးယူရန် ဖွဲ့စည်းလိုက်သည့် စုံစမ်းစစ်ဆေးရေး ကော်မရှင်က မတ်လ (၁၁)ရက်နေ့တွင် လာရောက်ရန် ဆင့်ခေါ်ထားကြောင်း သိရသည်။

အဆိုပါ (၆) ဦးအား စစ်ဆေးရန် ကော်မရှင်ကို မတ်လ (၇)ရက်နေ့က ဖွဲ့စည်းလိုက်ခြင်းဖြစ်ကြောင်း သိရသည်။

“သူတို့ သတင်းစာရှင်းလင်းပွဲပြုလုပ်တာတို့၊ ကြေညာချက်ထုတ်ပြန်တာတို့ဟာ ကျွန်တော်တို့ကို အသိမပေးခဲ့ဘူး။ လူပုဂ္ဂိုလ် သုံးလေးဦးရဲ့ ဆန္ဒနဲ့ ပြုလုပ်တာပဲဖြစ်တယ်။ ဒီကိစ္စရပ်အပေါ် ကျွန်တော်တို့ ပါတီတွင်း CEC အစည်းအဝေးပြုလုပ်ပြီး အစည်းအဝေးရဲ့ဆုံးဖြတ်ချက်အရ သူတို့ကို အရေးယူဖို့ စုံစမ်းစစ်ဆေးရေး ကော်မရှင်ဖွဲ့ထားပြီးပါပြီ။ စစ်ဆေးပြီးရင် အရေးယူဖို့ ပြုလုပ်သွားမှာပါ။ အမြင့်ဆုံးပြစ်ဒဏ်က ပါတီက ထုတ်ပယ်နိုင်ပါတယ်။”ဟု ရခိုင်အမျိုးသားပါတီ၏ စည်းကမ်းထိန်းသိမ်းရေး ကော်မတီ ခေါင်းဆောင် ဦးခိုင်ပြည်စိုးက ဆိုသည်။

အဆိုပါ ALD အဖွဲ့ဝင် (၆)ဦးမှာ ဦးကျော်မြင့်၊ ဦးလှမြင့်၊ ဦးမျိုးကျော်၊ ဦးမျိုးဆွေ၊ ဦးထွန်းရွှေသိန်းနှင့် ဦးသန်းနိုင်မြင့်တို့ဖြစ်ပြီး၎င်းတို့မှာ ရခိုင်အမျိုးသားပါတီနှင့် ပူးပေါင်းခဲ့ရာတွင် ပါဝင်ခဲ့သည့် ဗဟိုအလုပ်အမှုဆောင် ကော်မတီဝင်များဖြစ်ပြီး ANP က ထုတ်ပြန်ခဲသည့် ၁/၂၀၁၆ နှင့် ၂/၂၀၁၆ ကြေညာချက်တို့ကို လက်မခံကြောင်း မတ်လ ၆ ရက်နေ့က သတင်းစာ ရှင်းလင်းပွဲ ပြုလုပ်ခဲ့ကြခြင်းဖြစ်သည်။

အဆိုပါ သတင်းစာရှင်းလင်းပွဲပြုလုပ်ခြင်းသည် တရားမဝင်လုပ်ရပ်ဖြစ်သဖြင့် ပါတီ၏စည်းကမ်းဥပဒေအရ အရေးယူနိုင်ရန် ANP ဒုဥက္ကဌ (လက်ရှိ ရခိုင်ပြည်နယ်လွှတ်တော် ဒုဥက္ကဌ) ဦးဖိုးမင်းက ခေါင်းဆောင်ပြီး ဒေါ်အေးနုစိန်၊ ဦးတင်ညို၊ ဦးဖေသန်းနှင့် ဦးမောင်မောင်တို့ အဖွဲ့ဝင် ၅ ဦးပါ စုံစမ်းစစ်ဆေးရေးကော်မရှင် တစ်ရပ်ကို မတ်လ (၇ ) ရက်နေ့က ဖွဲ့စည်းလိုက်ခြင်းဖြစ်ကြောင်း သိရသည်။

“ပါတီတွင်း မျှတမှန်ကန်မူ မရှိတာမို့ ကျွန်တော်တို့ လက်ခံမှာ မဟုတ်ပါဘူး။ ကျွန်တော်တို့ကို စစ်ဆေးမယ့် ပုဂိ္ဂုလ်တွေကို ပြန်ပြီး စစ်ဆေးသင့်ပါတယ်။ ကျွန်တော်တို့ အနေနဲ့ကတော့ ဆရာတော်ကြီးတွေ၊ လူမူအဖွဲ့အစည်းတွေနဲ့ ရခိုင်ရပ်မိရပ်ဖတွေရှေ့မှာ ပါတီထဲက နှစ်ဖက်လုံးကို မျှမျှတတ မှန်မှန်ကန်ကန် စစ်ဆေးမယ် ဆိုရင်ဖြေရှင်းဖို့ အဆင်သင့်ပါပဲ။ သူတို့ စစ်ဆေးတာကိုတော့ လက်မခံပါဘူး။” ဟု သတင်းစာရှင်းလင်းပွဲပြုလုပ်ရာတွင် ပါဝင်သည့် ရခိုင်အမျိုးသားပါတီ ဗဟိုအလုပ်အမှုဆောင်အဖွဲ့ဝင်၊ ယခင် ရခိုင်ဒီမိုကရေစီအဖွဲ့ချူပ် ဗဟိုအလုပ်အမှုဆောင် ဦးမျိုးကျော်က တုန့်ပြန်လိုက်သည်။

ရခိုင်အမျိုးသားပါတီမှာ ရခိုင်ဒီမိုကရေစီအဖွဲ့ချူပ် (ALD) နှင့် ရခိုင်တိုင်းရင်းသားများ တိုးတက်ရေးပါတီ (RNDP) တို့ ပူးပေါင်းထားသည့် ပါတီဖြစ်ပြီး လက်ရှိဗဟိုအလုပ်အမှုဆောင် (၃၉) ဦးတွင် RNDP မှ (၃၂) ဦးနှင့် ALD မှ (၇) ဦးပါဝင်ခြင်း ဖြစ်သည်။

အလုပ်အမှုဆောင်ကော်မတီနှင့် ပါတီတွင်း ဆုံးဖြတ်ချက်များ ချမှတ်ရာတွင် လူများစုက လူနည်းစု၏ သဘောထားကို သွေဖီမှုများ အကြိမ်ကြိမ်ပြုလုပ်လာတာကြောင့် ယခုကဲ့သို့ သတင်းစာရှင်းလင်းပွဲ ပြုလုပ်ရခြင်း ဖြစ်သည်ဟု ALD ဗဟိုအလုပ်အမှုဆောင် ဦးလှမြင့်ကဆိုသည်။

အဆိုပါ သတင်းစာရှင်းလင်းပွဲကြောင့် ရခိုင်အမျိုးသားပါတီက ထုတ်ပြန်ထားသော ၁/၂၀၁၆ နှင့် ၂/၂၀၁၆ ကြေညာချက်များကို ပြင်ဆင်ရန်မရှိကြောင်း ဦးခိုင်ပြည်စိုးထံမှ သိရသည်။

၂၀၁၆ခုနှစ် မတ်လ ၆ ရက်နေ့ထုတ်ပြန်လိုက်သည့် ရခိုင်အမျိုးသားပါတီ (ALD ) ရဲ့ သဘောထား ထုတ်ပြန်ကြငြောချက်တွင် ရခိုင်အမျိုးသားပါတီ၏ မူလထုတ်ပြန်ချက်များဖြစ်သည့် ( ၁/၂၀၁၆) နှင့်( ၁/၂၀၁၆) ထုတ်ပြန်ချက်များသည် တစ်ဖက်စောင်းနင်း ထုတ်ပြန်ချက်များသာဖြစ်ပြီး၊ အစိုးရအဖွဲ့အပေါ် အတိုက်အခံ လုပ်မည်ဆိုသည့် ဆုံးဖြတ်ချက်များမှာလည်း မဲဆန္ဒရှင် ပြည်သူများအတွက် နစ်နာဖွယ် ရှိသည်ဟု ဖော်ပြထားခြင်းဖြစ်သည်။

လတ်တလောတွင်၎င်းတို့အားဆင့်ခေါ်သည့်စာမှာ၎င်းတို့ထံ ရောက်လာခြင်းမဟုတ်သည့်အတွက် တရားမဝင်ကြောင်း၊ ထို့အတွက် မလာနိုင်ကြောင်း ရခိုင်ဒီမိုကရေစီအဖွဲ့ချုပ် ALDမှ ဦးလှမြင့်က ဆိုသည်။

သတင်း။ RiA