ရှမ်းပြည်နယ်၊ မိုင်းဆတ်ခရိုင်၊ မိုင်းဆတ်မြို့နယ်၊ ၀ိန်းနေကျေးရွာအုပ်စု၊ ၀ိန်းကောင်းကျေးရွာတွင် ပြည်သူများ လွယ်လင့်တကူ အသိပညာဗဟုသုတများ လေ့လာဆည်းပူးနိုင်ပြီး ယဉ်ကျေးသိမ်မွေ့၍ ကိုယ်ကျင့်တရားကောင်းမွန်သော နိုင်ငံတော်ကို အကျိုးပြုမည့် သားကောင်း၊ သမီးမွန်များ ဖြစ်ထွန်းလာစေရေးတို့အတွက် မြတ်ရွှေအိုး စာကြည့်တိုက် ဖွင့်ပွဲကို မေလ(၃၀)ရက် နံနက်(၉)နာရီက အဆိုပါ ကျေးရွာစာကြည့်တိုက် အဆောက်အအုံရှေ့၌ ကျင်းပရာ ခရိုင်အုပ်ချုပ်ရေးမှူး ဦးကျော်ကျော်အုန်း၊ ပြည်နယ်လွှတ်တော်ကိုယ်စားလှယ် ဦးစိုင်းလုံ၊ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ခရိုင်ဦးစီးအရာရှိ ဦးလှဌေး နှင့် မြို့မိမြို့ဖ ဦးစိုင်းချစ်သောင်း တို့က ဖဲကြိုးဖြတ်ဖွင့်လှစ်ပေးသည်။
ဆက်လက်၍ စာကြည့်တိုက် ရှင်သန်ဖွံ့ဖြိုးတိုးတက်ရေးအတွက် အလှူငွေ နှင့် စာအုပ်စာစောင်များ ပေးအပ် လှူဒါန်းပွဲကျင်းပရာ မြို့နယ်အုပ်ချုပ်ရေးမှူး ဦးအေးနိုင်က အဖွင့်အမှာစကားပြောကြားပြီး၊ ခရိုင်ဦးစီးအရာရှိ ဦးလှဌေးက စာကြည့်တိုက် ရှင်သန်ဖွံ့ဖြိုးရေးနှင့်အဆောက်အအုံဆောက်လုပ်ရာတွင် အဖက်ဖက်မှ ပါဝင်လှူဒါန်းပေးသည့် အလှူရှင်များ အား ကျေးဇူးတင်စကားပြောကြားသည်။
ထို့နောက် မြို့နယ်အုပ်ချုပ်ရေးမှူး ဦးအေးနိုင်၊ ခရိုင်မီးသတ်ဦးစီးဌာနမှူး ဦးအောင်မင်း၊ ခရိုင်ပြည်သူ့ဆောက်လုပ်ရေးလုပ်ငန်းမှ ခရိုင်အင်ဂျင်နီယာမှူး ဦးအောင်ညို၊ ခရိုင်ပြန်/ဆက်ဦးစီးအရာရှိ ဦးလှဌေးနှင့် မြို့မိမြို့ဖ ဦးစိုင်းချစ်သောင်းတို့က စာအုပ်စာစောင်၊ အလှူငွေများပေးအပ်လှူဒါန်းရာ စာကြည့်တိုက်မှူး နှင့် စာကြည့်တိုက်ကော်မတီတို့က လက်ခံယူသည်။
အဆိုပါ စာကြည့်တိုက်မှာ အလျား (၂၄)ပေ၊ အနံ (၁၂)ပေ အကျယ်ရှိ အုတ်တိုက် သွပ်မိုး တစ်ထပ် အဆောက်အဦဖြစ်ပြီး ၊ ၂၀၁၂-၂၀၁၃ ဘဏ္ဍာနှစ်အတွင်း နိုင်ငံတော်မတည်ငွေကျပ် (၁၀)သိန်း၊ စေတနာရှင်ပြည်သူများမှ ပါဝင်လှူဒါန်းငွေ ကျပ် (၁၅)သိန်း စုစုပေါင်းငွေကျပ် (၂၅)သိန်း အကုန်ကျခံ ဆောက်လုပ်ခဲ့ခြင်းဖြစ်ကြောင်း သိရသည်။
